ရန်ကုန် လျှပ်စစ်မီး ခွဲတမ်း စနစ် ပြန်ဖြစ်ပြီ

အောင်ကျော်မိုး | ပြီးခဲ့သည့် သြဂုတ်လမှ နိုဝင်ဘာလကုန် အထိ ပုံမှန်ပေးထားသည့် ရန်ကုန် လျှပ်စစ်မီးကို ဒီဇင်ဘာ (၁) ရက်နေ့မှစ၍ ခွဲတမ်းဖြင့် စပေးနေကြောင်း ကျောက်တံတား မြို့နယ် လျှပ်စစ် အင်ဂျင်နီယာရုံးမှ တာဝန်ရှိသူ တဦးက ပြောသည်။

၎င်းက “မနှစ်တုန်းကလိုပါပဲ။ အရေးကြီး နေရာတွေကို (၂၄) နာရီ ပေးထားတယ်၊ သာမန်ပြည်သူတွေကိုတော့ A,B,C အုပ်စု (၃) စုခွဲပြီး မီးပေးပါတယ်။ ကိုယ် ဘယ်အုပ်စုမှာ ပါသလဲဆိုတာ မီတာ ပြေစာတွေမှာ ကြည့်နိုင်ပါတယ်။ အုပ်စု ဘယ်လိုခွဲသလဲ ဆိုတာ သိချင်ရင် ရုံးမှာ လာကြည့်ချင်ရင်လည်း ရပါတယ်။ တကြိမ်ကို (၆) နာရီ အလှည့်ကျပေးတာပါ” ဟု ပြောသည်။

ဗိုလ်တစ်ထောင် မြို့နယ်မှ အိမ်ရှင်မ တဦးက ပြီးခဲ့သည့် ကာလက လျှပ်စစ်မီး ပုံမှန်ပေးသည် ဆိုသော်လည်း ပျက်ချင်သလို ပျက်နေကြောင်း၊ ယခု ခွဲတမ်း ဆိုသော်လည်း လာချိန်တွင် ပျက်တာလည်း ရှိနေကြောင်း၊ ယခုနှစ် အတွက် အဆိုးဆုံးမှာ လျှပ်စစ် ဗို့အားများ အပြည့်အဝ မရဘဲ မီးအား အလွန် ကျဆင်းနေသည့် ပြဿနာ ဖြစ်ကြောင်း ပြောသည်။

ယခု ခွဲတမ်း စနစ်အရ နေအိမ် တအိမ်သည် ပထမ နေ့တွင် လျှပ်စစ်မီး (၁၂) နာရီ ပျက်ကာ ဒုတိယနေ့ လျှပ်စစ်မီး (၆) နာရီရပြီး တတိယနေ့တွင် (၁၂) နာရီ ပျက်သည့်အတွက် (၃) ရက် စုစုပေါင်း နာရီ (၃ဝ) ပျက်ကြောင်း၊ (၃) ရက်အတွင်း မီးလာချိန် စုစုပေါင်း (၄၂) နာရီရှိပြီး ည (၁၁) နာရီမှ နံနက် (၅) နာရီအထိမှာမူ အုပ်စုအားလုံး မီးရရှိကြကြောင်း၊ ရန်ကုန်တိုင်းအတွင်းက စက်မှုဇုန်တို့တွင်မူ ပြီးခဲ့သည့် မိုးတွင်း တလျှောက်လုံး တနေ့ (၅) နာရီသာ လျှပ်စစ်မီး ရရှိကြကြောင်း သိရသည်။

နအဖ စစ်အစိုးရသည် ၎င်းတို့ အာဏာရယူ ထားခဲ့သည့် အနှစ် (၂ဝ) ကျော် ကာလအတွင်း ပြည်သူလူထုကို အခြေခံအကျဆုံးဖြစ်သော လျှပ်စစ်မီးနှင့် သောက်သုံးရေ ပုံမှန် ရရှိအောင် စွမ်းဆောင် မပေးနိုင်သည့် အပေါ် ပြည်သူများက စိတ်ပျက်လက်ပျက် ဖြစ်နေကြပြီး ယခုနှစ်သည် အဆိုးဆုံးဖြစ်ကြောင်း ဝေဖန်ပြောဆိုနေကြသည်။

စစ်အစိုးရက ထုတ်ပြန်သည့် စာရင်း ဇယားများ အရ (၅) နှစ်အတွင်း လျှပ်စစ် ဓာတ်အား ထုတ်လုပ်မှု အတွက် စက်တပ်ဆင်အားမှာ မီဂါဝပ် (၁,၇ဝဝ) ခန့်မှ တိုးတက် မလာသည့် အပြင် ထုတ်လုပ်သည့် လျှပ်စစ်ဓာတ်အားမှာလည်း ကီလိုဝပ်နာရီ သန်းပေါင်း (၆) ထောင်ကျော်မှ တိုးတက်လာမှု မရှိခဲ့ပေ။

သို့သော် လျှပ်စစ် ဓာတ်အားခ ကောက်ခံသည့် အခွန်ငွေကိုမူ (၅) နှစ်အတွင်း (၅) ဆနီးပါး တိုးမြှင့်ပြီး ဘီလီယံ (၁၆ဝ) နီးပါး ကောက်ခံခဲ့သည်။

source by : ခေတ်ပြိုင်