သတင်း မင်းနိုင်သူ ခေတ်ပြိုင် | ပြီးခဲ့သည့်ရက်ပိုင်းအတွင်း ကမောက်ကမဖြစ်ခဲ့သော မြန်မာပဲဈေးကွက်အတွင်း အိန္ဒိယနိုင်ငံမှ ပြန်လည်ဝယ်ယူမှုများပြုလုပ်မည်ဟု ပဲကုန်သည်များအကြား သတင်းများ ပေါ်ထွက်ခဲ့သော်လည်း ညှိနှိုင်းဆဲသာဖြစ်ကြောင်း UMFCCI အတွင်းရေးမှူးတဦးက ထုတ်ဖော်ပြောဆိုသည်။
“နေပြည်တော်မှာ နိုဝင်ဘာ (၂၃) ရက်က အိန္ဒိယပဲဝယ်ယူရေးအဖွဲ့နဲ့ အကြို ညှိနှိုင်းမှုတွေ လုပ်ခဲ့တာပါ။ စာချုပ်အားဖြင့်တော့ ပဲတန်ချိန် (၁) သန်းပေါ့လေ။ အိန္ဒိယဘက်က (STC) ကုမ္ပဏီနဲ့ မြန်မာဘက်က UMFCCI ပေါ့ဗျာ။ အဲဒါတွေက နိုင်ငံကိုယ်စားပြုပြီး ရောင်းဝယ်ကြဖို့ အကြမ်းဖျင်းညှိနှိုင်းမှုတွေ လုပ်ခဲ့တာပါ” ဟု ၎င်းက ဆိုသည်။
မြန်မာပဲကုန်သည်များအကြားတွင်မူ အိန္ဒိယမှ ပဲဝယ်မည်ဆိုခြင်းကြောင့် ပဲဈေးကွက်အနည်းငယ် လှုပ်ရှား ဈေးမြောက်လာသော်လည်း တင်ပို့မှုများ မည်သည့်အချိန်တွင် စတင်နိုင်မည်ကို ပြောဆိုနိုင်ခြင်း မရှိ သေးကြောင်း နှင့် အကြိုညှိနှိုင်းမှုများ ပြုလုပ်ဆဲသာဖြစ်ကြောင်း UMFCCI က ပြောသည်။
မုံရွာမြို့မှ ပဲကုန်သည်တဦးက “အိန္ဒိယက တန်ချိန် (၁) သန်းဝယ်မယ်လို့တော့ ကြားတယ်။ ဒီဘက်မှာ အဲဒီအတွက် အများဆုံးဝယ်နေကြတာကတော့ ပဲစင်းငုံ၊ ဗွီတူးက ၀ယ်တော့ဝယ်တယ် နည်းတယ်။ မန္တလေး၊ မုံရွာ၊ ပခုက္ကူဘက်ကို နိုဝင်ဘာ (၂၈-၂၉-၃၀) ရက်တွေမှာ စီးပွားကူးသန်းဝန်ကြီးလာပြီး စုပေါင်းရောင်းကြဖို့ ပြောသွားတယ်။ အများပိုင်ကုမ္ပဏီသဘောပေါ့။ ၀ယ်တာကတော့ စီးပွားကူးသန်းက ၀ယ်ယူတင်ပို့မယ်လို့ ကြားတယ်” ဟု ပြောသည်။
စီးပွားကူးသန်းဝန်ကြီးက အများပိုင်ကုမ္ပဏီသဖွယ် စုပေါင်းရောင်းချကြရန်ပြောသော်လည်း ကုန်သည်အများစုက စုပေါင်းရောင်းဝယ်လိုသည့် ဆန္ဒမရှိကြကြောင်း စုံစမ်းသိရှိရသည်။ အလားတူ အများပိုင်ကုမ္ပဏီဖွဲ့ခိုင်းခြင်းကို ဗိုလ်ချုပ်သာအေး စစ်ကိုင်းတိုင်းမှူးဖြစ်စဉ်ကလည်း စေခိုင်းခဲ့ဖူးပြီး နောက်ပိုင်းတွင် ကုန်သည်၊ ပွဲစားများက လိုလားမှုမရှိခြင်းကြောင့် ပျက်ပြယ်ခဲ့သည်။
“အခုကတော့ မဖွဲ့လို့မရဘူးလို့ ပြောတယ်။ ကုန်စည်ဒိုင်အသင်းသားတိုင်း တစုကို (၁) သိန်းနှုန်းနဲ့ တဦးကိုတစု မ၀ယ်မနေရ၀ယ်ရမယ်တဲ့။ ဒီလိုစုဖွဲ့ပြီး လုပ်တဲ့အခါ ဦးစီးဦးဆောင်လုပ်မယ့်လူတွေရဲ့ အကျင့် စာရိတ္တ ကောင်းမကောင်းဆိုတာလည်း အရေးကြီးတယ်လေ။ ကိုယ့်ငွေကို သူများလက်ထဲထားပြီး လုပ်ရမှာမျိုးကတော့ လက်တွန့်ကြတာ အမှန်ပဲဗျ။ ကုန်စည်ဒိုင်မှာ ရေးထားတာတော့ အစု (၁၀၀) ပိုင်ဆိုင်တဲ့သူဟာ ဒါရိုက်တာအဖြစ် အရွေးခံနိုင်တယ်လို့ ရေးထားတယ်။ အသင်းသားတွေကတော့ ၀ယ်ယူလိုခြင်းမရှိကြဘူးဗျာ။ မဖြစ်မနေ ၀ယ်ရမယ် ဆိုလို့သာ ၀ယ်ကြရမှာကိုး။ ဒီတော့ အစု (၁၀၀) မပြည့်ဘဲနဲ့ ဘယ်သူတွေ ဒါရိုက်တာဖြစ်လာဦးမလဲ မသိနိုင်ဘူး’’ ဟု မန္တလေးမြို့မှ အိတ်စပို့ ၀ယ်လက်တဦးက ရှင်းလင်းပြောဆိုသည်။
ယင်းကဲ့သို့ အများပိုင်ကုမ္ပဏီများ ဖွဲ့စည်းပြီးပါက စီးပွားကူးသန်းဝန်ကြီးဌာနက ဈေးနှုန်း တပြေးညီ သတ်မှတ် ၀ယ်ယူသွားမည်ဟု သိရှိထားရာ သယ်ယူပို့ဆောင်စရိတ်မတူညီနိုင်သော နယ်မြို့ ကြီးများမှ ကုန်သည်များ အနေဖြင့် တောင်သူများထံမှ ပြန်လည် ၀ယ်ယူရာတွင် ဈေးခွာ ၀ယ်ယူရမည့် သဘော ဖြစ်နေကြောင်း အဓိကပဲထွက်ရာ အညာဒေသမှ ကုန်သည်ပွဲစားများက ပြောသည်။
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။