သတင်း NEJ ခေတ်ပြိုင် | မြန်မာ့ခရီးသွားလုပ်ငန်းသည် ၂ဝဝ၇ ခုနှစ်နှင့် နှိုင်းယှဉ်ပါက ၂ဝဝ၈ ခုနှစ်မှာ (၃ဝ) ရာခိုင်နှုန်းအထိ ကျဆင်းခဲ့ပြီး ယခုကဲ့သို့ ကျဆင်းမှုကို ပြန်လည် ကုစားနိုင်ရန် အဓိကအားဖြင့် အစိုးရက ဗီဇာများ လွယ်လွယ်ကူကူ ထုတ်ပေးရန် လိုအပ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌ ဦးမောင်မောင်ဆွေ က ထုတ်ဖော် ပြောဆိုသည်။
ပြီးခဲ့သည့် စနေနေ့က UMFCCI ရုံး၌ ကျင်းပသည့် Forum on implication of the global economic crisis အမည်ရှိ ဖိုရမ်တွင် ဦးမောင်မောင်ဆွေက ယခုကဲ့သို့ ပြောဆိုခဲ့ခြင်းဖြစ်သည်။
၎င်း၏ ပြောဆိုချက်အရ ၂ဝဝ၆ ခုနှစ်တွင် ရန်ကုန်၊ မန္တလေး လေဆိပ်ဝင်ပေါက်များမှတဆင့် နိုင်ငံခြားသား ခရီးသွား (၂၆၃,၅၁၄) ယောက် ဝင်ခဲ့ကြောင်း၊ ၂ဝဝ၇ ခုနှစ်မှာမူ (၂၄၈,ဝ၇၆) ဦး ဝင်ခဲ့ပြီး ၂ဝဝ၆ ကထက် (၆) ရာခိုင်နှုန်းခန့် ကျဆင်းခဲ့ကြောင်း၊ ၂ဝဝ၈ ခုနှစ်မှာမူ (၁၇၇,ဝဝဝ) ဦးသာ ဝင်သည့်အတွက် ၂ဝဝ၇ ခုနှစ်နှင့် နှိုင်းယှဉ်ပါက (၃ဝ) ရာခိုင်နှုန်းနီးပါး ကျဆင်းခဲ့ကြောင်း သိရသည်။
မြန်မာနိုင်ငံသည် အိမ်နီးချင်းနိုင်ငံများနှင့် နှိုင်းယှဉ်ပါက ခရီးသွားလုပ်ငန်းမှာ အနိမ့်ပါးဆုံး အခြေအနေတွင် ရှိကြောင်း စာရင်းဇယားများ နှင့်တကွ ပြောပြသည်။ ၎င်း၏ ရှင်းပြချက်အရ ပြီးခဲ့သည့်နှစ်က ထိုင်းနိုင်ငံတွင် ခရီးသွား (၁၄) သန်းကျော် လာကြောင်း၊ မြန်မာထက် အဆပေါင်း (၅ဝ) ကျော် ပိုများကြောင်း၊ ကမ္ဘောဒီးယား နိုင်ငံမှာလည်း ၂ဝဝ၇ ခုနှစ်အတွင်း လူ (၂) သန်းကျော်လာသည့် အတွက် မြန်မာထက် (၁ဝ) ဆခန့် များကြောင်း၊ ကုန်းပိတ်နိုင်ငံငယ်လေး ဖြစ်သည့် လာအိုနိုင်ငံပင်လျှင် (၁.၆၂) သန်းရှိသည့်အတွက် မြန်မာထက် (၄-၅) ဆ ပိုများကြောင်း သိရသည်။
ယခု အခြေအနေများကို အစိုးရပိုင်းက ကူညီမည်ဆိုပါက ငွေကုန်ကြေးကျ မရှိဘဲ ထိထိရောက်ရောက် ကူညီနိုင်မည့် နည်းလမ်းမှာ ဗီဇာကို လွယ်လွယ်ကူကူ ပေးသည့်နည်းဖြင့်ကူညီနိုင်ကြောင်း ဆွေးနွေးခဲ့သည်။
လောလောဆယ် မြန်မာနိုင်ငံသည် မည်သည့် နိုင်ငံကိုမှ ဗီဇာ Free ခွင့်ပြုထားခြင်း မရှိသည့်အပြင် ဆိုက်ရောက် ဗီဇာပေးသည့် စနစ်ကိုလည်း ကျင့်သုံးခြင်း မရှိသေးပေ။ နိုင်ငံတွင်းကို သတင်းထောက်များ ဝင်ရောက်မည်ကို စိုးရိမ်သည့်အတွက် နိုင်ငံအသီးသီးက မြန်မာ သံရုံးများသည် ဗီဇာပေးရာ၌ အလွန်တင်းကျပ်ထားလေ့ရှိသည်။ မတော်တဆ သတင်းထောက်တယောက်ယောက်ကို ဗီဇာ မှားယွင်းပြီး ပေးမိပါက သက်ဆိုင်ရာ သံရုံးမှ ဗီဇာကိစ္စ ကိုင်တွယ်ရသူ အရာရှိများအနေဖြင့် အရေးယူခံရနိုင်ခြင်းကြောင့်လည်း ယခုကဲ့သို့ ဗီဇာကိစ္စ တင်းကျပ်ရခြင်း ဖြစ်သည်ဟု သိရသည်။
နိုင်ငံခြားသားများအနေဖြင့် မြန်မာပြည်တွင်း ဝင်ရောက်လာပါကလည်း သွားလိုရာသို့ လွတ်လွတ်လပ်လပ် သွားလာခွင့် မရကြပါဘူး။ လေဘေးဒဏ်ခံ ဧရာဝတီတိုင်း နှင့် နယ်စပ်ဒေသများ အပါအဝင် နေရာဒေသ အတော်များများကို သွားလာခွင့် မရကြပေ။ ထို့အပြင် ပြည်တွင်းခရီးစဉ် ပျံသန်းသည့် လေယာဉ်နည်းပြီး ခရီးစဉ်နည်းနေခြင်းကြောင့် လိုအပ်သည့်အချိန် ခရီးသွားမရခြင်းမျိုးများလည်း ကြုံနေရကြောင်း ခရီးသွား အေဂျင်စီများက ပြောပြကြသည်။
လောလောဆယ် ကမ္ဘာတဝှမ်း စီးပွားပျက်ကပ် ရင်ဆိုင်နေရကာ ခရီးသွားလုပ်ငန်းများ ထိခိုက်နေခြင်း၊ မြန်မာနိုင်ငံ ၏ အဓိက ဝင်ပေါက်ဖြစ်သည့် ထိုင်းနိုင်ငံမှာ နိုင်ငံရေး မတည်မငြိမ်ဖြစ်ပြီး ၎င်းကိုယ်တိုင်၏ ခရီးသွားလုပ်ငန်းလည်း ကျဆင်းနေခြင်း စသည် တို့ကြောင့် ယခု ၂ဝဝ၉ ခုနှစ်မှာ မြန်မာ့ခရီးသွားလုပ်ငန်း ပိုမိုကျဆင်းဖွယ်ရှိကြောင်း ခရီးသွားအေဂျင်စီများထံမှ စုံစမ်းသိရှိရသည်။
ဦးမောင်မောင်ဆွေကမူ အစိုးရကသာ ဗီဇာ Free ပေးခဲ့ပါက ခရီးသွားလုပ်ငန်း စပြီး အသက်ရှူချောင်သွားမည် ဖြစ်ကြောင်း ၎င်း၏ ဆွေးနွေးချက်တွင် ထည့်သွင်းဆွေးနွေးခဲ့သည်။
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။