ဒီရေ သတင်းများ

သို့သော် ပြည်သူတို့သိနေသောသတင်းမှာ ဖုန်းအားလုံးကို ဈေးတိုးမြှင့်ကောက်ခံမည်ဟုသာ သိနေကြကြောင်း ရန်ကုန်မြို့ခံ တဦးက ပြောသည်။

ရန်ကုန်မြို့ ဆိပ်ကမ်းသာလမ်းမှ အိမ်ဖုန်းကို အများသုံးဖုန်းအဖြစ် အသုံးပြုဝင်ငွေရှာနေသူတဦးက “သူတို့က (၁) မိနစ်ကို (၅၀) ကျပ်ဆိုတော့ ကျမတို့က (၁) မိနစ်ကို (၁၀၀) ယူတော့မယ်။ ခက်တာက ဖုန်းခတွေ ဈေးတက်တယ်လို့ ပြောတဲ့နေ့ကပဲ အရင်နေ့တွေလို ဖုန်းပြောသူတွေ မရှိတော့ဘူး။ သေရေးရှင်ရေးတွေကလွဲရင် လျော့ကျသွားတယ်” ဟု ပြောသည်။

မြို့အနှံ့တွင် ချထားပေးသည့် မြန်မာ့ဆက်သွယ်ရေးမှ အများသုံးဖုန်း၏ ဈေးနှုန်းများ မပြောင်းလဲကြောင်း မြန်မာ့ဆက်သွယ်ရေး လုပ်ငန်း၏ တာဝန်ရှိသူတဦးက ပြောကြားခဲ့သော်လည်း အဆိုပါ ဆက်သွယ်ရေးအများသုံးဖုန်းများတွင် ထိုင်သည့် ဆက်သွယ်ရေးဝန်ထမ်းများက ဖုန်းခကို တိုးမြှင့်တောင်းဆိုကြောင်း တာမွေမြို့နယ်တွင် နေထိုင်သူတဦးက ပြောသည်။

၎င်းက “အမလေး၊ ဖုန်းဆိုင်ထိုင်တဲ့ အမျိုးသား အမျိုးသမီးတွေက နဂိုကပဲ (၃) မိနစ်ကို (၅၀) ပဲ ယူရမှာကို (၁၀၀) ကျပ် ယူနေတဲ့သူတွေလေ။ အခု ဖုန်းတွေ ဈေးတက်လိုက်ပြီလည်းဆိုရော အခု (၃) မိနစ်ကို (၁၅၀) ကျပ် ပေးခဲ့ရတယ်။ ဘယ်လိုပုံမျိုးနဲ့ ကောက်နေတယ် ဆိုတာတော့ မသိဘူး” ဟု ပြောသည်။

မြန်မာ့ဆက်သွယ်ရေးက ကြိုးဖုန်း မြို့တွင်း (၁) မိနစ်ခေါ်ဆိုခကို (၁၅) ကျပ်၊ နယ်ဝေး (၁) မိနစ် (၂၅) ကျပ်ဟု သတ်မှတ်ထား ပြီးဖြစ်သည်။

ဖုန်းခေါ်ဆိုခများ တိုးမြှင့်လိုက်သည့်အတွက် လမ်းဘေး အများသုံးဖုန်းဆိုင် ထိုင်သူများက ဈေးတိုးတောင်းနိုင်သည့်အတွက် ဖုန်းကိုယ်ပိုင်မရှိသည့် ပြည်သူတို့အနေဖြင့် ဆက်သွယ်ရေး အခက်အခဲ တွေ့လာနိုင်ကြောင်း မြန်မာ့ဆက်သွယ်ရေး အရာရှိတဦးက ပြောသည်။

“ကျနော်တို့ ဆက်သွယ်ရေးက လမ်းဘေး အများသုံးဖုန်းတွေ ထိုင်သူတွေကို ပြောထားပါတယ်။ ဈေးမတင်ကြဖို့ကိုပေါ့။ တကယ်လို့ ပိုတောင်းတယ်ဆိုရင် ဆက်သွယ်ရေးရုံးတွေကို တိုင်ပါ” ဟု ၎င်းက ပြောသည်။

ကမ္ဘာနှင့်တ၀န်း စီးပွားရေး ကပ်ဆိုက်ခဲ့သည့် ၂၀၀၈ စီးပွားရေး ပျက်ကပ်နှစ်ကြောင့် မြန်မာနိုင်ငံအတွင်း ပြည်သူတို့ စားဝတ်နေရေး အခက်ကြုံနေရစဉ် ယခုကဲ့သို တယ်လီဖုန်းဈေးနှုန်းများ တိုးကောက်ခြင်းမှာ အလွန်အရုပ်ဆိုးသော ပြယုဂ်တခု ဖြစ်ကြောင်း ၀ါရင့်ရှေ့နေတဦးက ပြောသည်။

ထို့အပြင် ၎င်းက “ရွေးကောက်ပွဲအတွက် ပြင်ဆင်ရမယ့် အရာတွေထဲမှာ ဈေးနှုန်းမတက်ဖို့ အဓိကကျတယ်။ ဒါပေမယ့် အစိုးရက ဖုန်းတွေကို နှစ်ဦးမှာပဲ ဈေးတက်ပြတယ်။ ဒီလိုတက်ရင် ပြည်သူတွေက ဘယ်လိုတုံ့ပြန်မလဲဆိုတာ စမ်းသပ်တာ ဖြစ်နိုင်တယ်။ ဒါက အစိုးရရဲ့ ဗီဇပါနေတဲ့ အကျင့်တခုဖြစ်တယ်” ဟု ပြောသည်။

မြန်မာနိုင်ငံတွင် အသုံးပြုနေသည့် ကြိုးဖုန်းအရေအတွက်မှာ (၄) သိန်းခန့်ရှိပြီး အမျိုးအစားစုံ မိုဘိုင်းဖုန်း အသုံးပြုသူ အရေအတွက် (၅) သိန်းနီးပါးရှိကြောင်း ပြည်တွင်းသတင်းဂျာနယ်များတွင် ဖော်ပြသည်။

source by : ခေတ်ပြိုင်