ရန်ကုန်ရှုခင်း

မိုးမခ | ဒေါ်အောင်ဆန်းစုကြည်ကို တရားစွဲ၊ အမှုဆင် ထောင်ချဖို့ ကြိုးစားနေစဉ်မှာပဲ လူထုအုံကြွမှုကို ကြောက်လန့်ပြီး နေ့ခင်း ကြောင်တောင် ရဲလုံထိန်းကားတွေ မီးနီ မီးဝါ ဖွင့်လို့ မြို့ထဲ လှည့်ပြီး ဟန်ရေး ပြနေတာတွေကို လူထုက မြင်တွေ့ရပြီး ဘယ်မှာ ဘာဖြစ်သလဲလို့ တယောက်နဲ့ တယောက် မေးကြမြန်းကြ။ အမှန်ကတော့ ဘာမှ မဖြစ်ဘဲ လုံခြုံရေးတွေကို တပ်လှန့်ထားတာ သက်သက်ပဲ ဆိုတာ နောက်မှ သိကြရတယ်။

ညသန်းခေါင်လို အချိန်မျိုးမှာတောင်မှ လုံထိန်းတွေ စခန်းချတဲ့ အစိုးရ အဆောက်အဦ၊ ဝင်းတွေထဲ ဟေး၊ ဝါးနဲ့ လေ့ကျင့်သံတွေ ပေးပြီး လူထုကို ခြောက်လှန့်နေတာကိုလည်း အနီးအနား နေတဲ့ သူတွေ မြင်ရကြားနေရပါတယ်။

ရန်ကုန် လူထုထဲမှာတော့ ဒေါ်အောင်ဆန်းစုကြည်ရဲ့ တရားရုံးသတင်းကို နေ့စဉ် နားစွင့်နေတဲ့သူ အများ အပြား ရှိသလိုပဲ တနေ့လုပ်၊ တနေ့စားရသူတွေ၊ ဝဝစားဖို့ အခက်အခဲ ရှိသူတွေကို နေ့တွက် ၂ထောင် ၃ထောင်မျိုး ပေးပြီး စွမ်းအားရှင်၊ ကြံ့ဖွံ့တွေ အဖြစ် အင်အားပြ၊ သတင်းပေး လုပ်နေကြသူတွေလည်း ရှိနေပါသေးတယ်။ ဆင်းရဲမှုဟာ အစိုးရမကောင်းလို့ ဆိုတဲ့အချက်ကို ယေဘုယျ အားဖြင့် သိရှိကြပေမယ့်၊ ကြပ်တည်း ဆင်းရဲ၊ အကာအကွယ်မဲ့နေတဲ့ အခြေအနေမှာ အာဏာရှိသူက ငွေပေး သွေးထိုးပေးကာ ခိုင်းတာကို လုပ်မယ့်သူ ရှိတာလည်း ယနေ့ မြန်မာနိုင်ငံ အခြေအနေ တရပ်ပါ။

မနေ့ကတော့ မကြာခင် ရက်ပိုင်းအတွင်း အဖမ်းခံရတဲ့ မိသားစုဝင်တွေက အမေရိကန် သံရုံးရှေ့မှာ ကူညီဖို့ သွားတောင်းဆို ဆန္ဒပြလို့ ရဲတွေက ဖမ်းသွားတဲ့ သတင်းက မနေ့က ကြားသိရပါတယ်။ နိုင်ငံရေး ပါဝင်လှုပ်ရှားသူတွေကို နအဖ စစ်အစိုးရက ဖမ်းဆီးနေတာကို ကယ်ရာမဲ့ ခံစားရလို့ အမေရိကန် သံရုံးရှေ့မှာ သွားပြီး အကူအညီ တောင်းတဲ့ သဘော ဖြစ်မယ် လို့ နားလည်မိပါတယ်။

ဒီပဲယင်း နှစ်ပတ်လည်နေ့မှာ ဓနုတ်ဘုရားပြို

ဒလမြို့နယ် ဓနုတ်ကျေးရွာက ဘုရားပြိုတဲ့ သတင်းကို ဘယ်ဂျာနယ်၊ ဘယ်စာစောင်မှာမှ ဖော်ပြခွင့် မပြုပေမယ့် ပြည်ပက လွှင့်တင်တဲ့ အင်တာနက် ဝက်ဆိုက်တွေ၊ ရေဒီယိုတွေမှာ ဖြစ်ကြောင်း ကုန်စင် ဖော်ပြကြပါတယ်။ ဖြစ်ပြီး ၆ရက်အကြာ ဇွန်လ ၄ရက်နေ့ မှာတော့ စစ်အစိုးရရဲ့ သတင်းစာမှာ ခပ်မှိန်မှိန် ဖော်ပြတာ တွေ့ရပါတယ်။ အလှူရှင်၊ စေတနာရှင်တွေရဲ့ စောစီးစွာ ထီးတင်လိုတဲ့ ဆန္ဒကြောင့် အလျင်စလို တည်ဆောက်ရတာကြောင့် အရည်အသွေး မမှီဖြစ်ပြီး ပြိုကျရတယ်လို့ ထုတ်ပြန်ခဲ့ပါတယ်။ အဖြစ်မှန်ကတော့ ထီးတော်ကို မိုးကြိုးခတာကြောင့်လို့ ရွာခံတွေက နောက်ပိုင်းမှာ အတည်ပြုခဲ့ကြပါတယ်။ မိုးကြိုးလွဲ မတပ်ဆင်ထားတာကြောင့် မိုးကြိုးဒဏ်ကို ခံစားရတာဖြစ်တယ်လို့ သိရပါတယ်။ ဒေါ်ကြိုင်ကြိုင်နဲ့ သူ့သားသမီးတွေ လာရောက်ပြီး ထီးတင်သွားတဲ့ ရှေးဟောင်းစေတီကို ဒေါ်အောင်ဆန်းစုကြည်ကို ပထမအကြိမ် လုပ်ကြံခဲ့တဲ့ ဒီပဲယင်း နှစ်ပတ်လည်နေ့မှာ မိုးကြိုးခတယ် ဆိုတာ နအဖ စစ်ခေါင်းဆောင်တွေကို နိမိတ်ပြတာပဲလို့ မြန်မာတွေက ယုံကြည် တွေးဆ ကြမှာပါ။

စေတီပြိုပြီး နောက်တနေ့ အပျက်အစီးများကြားမှာ ပိတ်မိနေသူတွေ ရှိနေသေးတယ် လို့ ကံဆိုးသူများရဲ့ ဆွေမျိုးသားချင်းတွေက အကူအညီ တောင်းနေခဲ့ပေမယ့် ဘုရားရဲ့ စိန်ဖူးတော်ကို အရင် တွေ့အောင်ရှာပြီး လူအသက်က စိန်ဖူးတော်လောက် အရေးမကြီးဘူး ဆိုတာလည်း ကိုယ်တိုင် သွားရောက်ခဲ့သူတွေ ပြောပြချက်အရ သိရပါတယ်။

ရန်ကုန်ရဲ့မီးဒုက္ခ

အမြဲတမ်း မီးမလာတဲ့ ရန်ကုန်မြို့ရဲ့ လမ်းဆုံတွေ အနက်က တခုဖြစ်တဲ့ မင်္ဂလာတောင်ညွန့်မြို့နယ် ဒေါ်သိန်းတင်လမ်း နဲ့ အထက်ပန်းဆိုးတန်းလမ်း ဆုံရာ မီးပွိုင့်က ဒီမနက် မီးလင်းနေတော့ ဒါက သတင်းပါလား လို့ နားလည် သဘောပေါက်လိုက်ပါတယ်။ ရန်ကုန်မြို့လယ်က အချက်အချာကျတဲ့ သိမ်ဖြူလမ်း၊ အနော်ရထာလမ်း၊ ပန်းဆိုးတန်းတို့လို လမ်းဆုံလမ်းခွတွေရဲ့ မီးပွိုင့်တွေ မီးမလာတာ ကြာလှပေါ့။ အဲဒီ လမ်းဆုံတွေမှာ ဘတ်စ်ကားတွေ တက်စီတွေနဲ့ အိမ်စီးကားတွေ ဒွေးရောယှက်တင်နဲ့ လုမောင်းနေကြတာ အသည်းယားစရာလည်း ကောင်းလှပါတယ်။

အခုလို မလင်းစဖူး လင်းနေတော့ ဒါကို သတင်းခေါင်းစဉ်လုပ်ပြီး ရန်ကုန်မြို့ မီးပွိုင့်အချို့ မီးပြန်လာလို့ ရေးပြီး စိစစ်ရေးကို တင်လိုက်ရရင်တော့ စိစစ်ရေးက ငြှိုးမှာ သေချာတယ်။ သိသိကြီးနဲ့ အစိုးရကို အရှက်ခွဲတာ လို့ ဗြောင်မစွပ်စွဲတောင် ဂျာနယ်ကို နောက်သီတင်းပတ်တွေကျရင် လုပ်ရ ကိုင်ရ ခက်အောင် ဒုက္ခပေးမှာ သေချာတယ်။

ရန်ကုန်မြို့မှာ မီးမလာတာ သတင်း မဟုတ်တော့ဘဲ မီးလာတာက သတင်း ဖြစ်နေတော့တယ်။ မီးကို အေ၊ ဘီ၊ စီ ဆိုပြီး အုပ်စုတွေခွဲ ရှုပ်ရှုပ်ထွေးထွေးတွေ စဉ်းစားပြီး မီးပေးတာ ကြာလှပေါ့။ မီးမှန်မှန် မလာတာ ကြာတော့ မီးဆိုတာ အလှည့်နဲ့ပေးတဲ့အမျိုးလို့ ရန်ကုန်မြို့ခံတွေက နားလည် လက်ခံကြကုန်ရော။ ဒီအပတ် ထုတ်ဂျာနယ် အချို့မှာ လာမယ့် ဇူလိုင်လလယ်ရောက်ရင် မီး ၂၄ နာရီ လာမယ် ဆိုတာမျိုး ဖတ်ရရင်ကိုပဲ မျှော်လင့်ခြင်းတွေ ပြန်ပေါ်လာကြတဲ့ ဘဝပါ။ အိမ်နီးချင်း ကွန်မြူနစ် အုပ်ချုပ်ခဲ့တဲ့ လာအိုလို၊ ပြည်တွင်းစစ် နှစ်ပေါင်းများစွာဖြစ် လူသန်းနဲ့ချီ အသတ်ခံခဲ့ရတဲ့ ကမ္ဘောဒီးယားလို နိုင်ငံတွေတောင် လျှပ်စစ်မီးကို မှန်အောင်ပေးနိုင်ကြရင် မြန်မာနိုင်ငံက စစ်အစိုးရဟာ အဲဒီအစိုးရတွေ အားလုံးထက် အဆင့်အတန်း နိမ့်တယ် ဆိုတာ ပေါ်လွင်နေပါတော့တယ်။

အက်ဖ်အီးစီ ၅ဝ တန် ဖုန်းကတ် ရောင်းပြန်ပြီ

အရင် တခါသုံး ကတ်တွေ ရောင်းတုန်းက လူတွေ အုံးအုံးကြွက်ကြွက် ဝယ်ကြ၊ အက်ဖ်အီးစီ ၂ဝ တန် တကတ်ကို တလတောင် မပြည့်ခင် ပြောလို့ကုန်သွားတော့ ပစ်လိုက်ကြရနဲ့ ပြန်ဖြည့်လို့ရမယ့် ၅ဝ ကတ် လာမယ် ဆိုတဲ့ သတင်းတွေ ပေါ်ထွက်နေတာ လနဲ့ချီခဲ့ပါပြီ။

မကြာမီရက်ပိုင်းမှာတော့ မျှော်လင့်နေကြတဲ့ ၅ဝ တန် ကတ် လာပါပြီ တဲ့။ ဒါပေမယ့် မိနစ် ထပ်ဖြည့်လို့လည်း မရဘဲ စတင်သုံးပြီး ရက် ၆ဝ မှာ သက်တမ်းကုန်မယ့် အပြင် အရင်လူတွေ ကိုင်နေတဲ့ ဂျီအက်စ်အမ် ဆင်း ကတ် မဟုတ်တော့ပဲ စီဒီအမ်အေ ၄၅ဝ မီဂါဟတ်စနစ်၊( ဒီမှာတော့ ကမ်းရိုးတန်းဖုန်းလို့ ခေါ်) ဖြစ်နေ ပြန်ပါရော။ ၂ဝတန်ကတ် သုံးသူတွေ ၅ဝတန်ကတ် ပြောင်းသုံးလိုရင် ကမ်းရိုးတန်းဖုန်း ဟန်းဆက်ကို ဝယ်ရမယ့် သဘော ဖြစ်သွားပါတယ်။ ကမ်းရိုးတန်းဖုန်း ဟန်းဆက်တွေကို ရောင်းချင်လို့ ဒီကတ်ကို ပွဲထုတ်တာလား၊ ဂျီအက်စ်အမ် နက်ဝေါ့ခ်မှာ လိုင်းတွေ ရောင်းတာ များလွန်းသွားပြီး နက်ဝေါ့ခ်ရဲ့ စွမ်းဆောင်နိုင်အား မရှိတော့လို့ပဲ ကမ်းရိုးတန်းဖုန်း စနစ်ကို ပြောင်းတာလား ဆိုတာကိုတော့ ဒီကတ် ရောင်းခွင့်ရတဲ့ ထူးကုမ္ပဏီနဲ့ အစိုးရပဲ သိပါလိမ့်မယ်။