 ကချင်ပြည်နယ်နေ့ မနောပွဲတော် ကျင်းပခြင်း ဆိုင်းဘုတ်ကြီးများ မြစ်ကြီးနားတွင် နေရာအနှံ့အပြား တွေ့သည်။ ဇန်န၀ါရီလ ၁၁ ရက်နေ့အထိ ကြာမြင့်မည့် မနောပွဲကို ကချင်အဖွဲ့များနှင့် စစ်အစိုးရ ကိုယ်စားလှယ်တို့ တက်ရောက်မှာ ဖြစ်သည်။ ဓာတ်ပုံ- မဇ္ဈိမ |
ခရစ်ယာန်သာသနာပြုများနှင့် ကချင်ရိုးရာယဉ်ကျေးမှုကော်မတီက ကြီးကြပ်ဖွင့်လှစ်ခဲ့သည့် ပွဲတော်သည် ဇန်န၀ါရီ ၁၁ ရက်နေ့အထိ ကြာမြင့်မှာဖြစ်ပြီး ၆၁ နှစ်မြောက် ကချင်ပြည်နယ်နေ့ကိုလည်း တပါတည်း ကျင်းပသွားမှာဖြစ်သည်။
''ထူးထူးခြားခြားကတော့ မနောအကကို ၈ ရက်မှာ ဖွင့်မယ်။ အထိမ်းအမှတ်အနေနဲ့ ကချင်တိုင်းရင်းသားတွေ အားလုံး တေးသရုပ်ဖော် အကကို ထူးထူးခြားခြား ကပြကြမှာ ဖြစ်တယ်" ဟု ကချင်ရိုးရာ ယဉ်ကျေးကော်မတီမှ မနောပွဲ ဖြစ်မြောက်ရေး ခေါင်းဆောင် ဦးလမိုင်ဂွမ်ဂျာက မဇ္ဈိမကို ပြောသည်။
''မနောပွဲကတော့ အရမ်းအရေးကြီးတဲ့ ပွဲဖြစ်ပါတယ်။ ဘာဖြစ်လို့လဲဆိုတော့ ဒီပွဲက ကျနော်တို့ တိုင်းရင်းသားတွေ အနေနဲ့ ဘာသာရေးအရရော၊ အဖွဲ့အစည်းရောပေါ့၊ အတူစားကြ ပျော်ကြနဲ့ အားလုံးက စည်းလုံးညီညွတ်မှုကို ရတယ်လေ။ တန်ဖိုးမဖြတ်နိုင်တဲ့ အကျိုးကျေးဇူးပါပဲ။ ကျနော့်အနေနဲ့ နှစ်တိုင်း ဘယ်လောက်ပဲ ခက်ခဲနေပါစေ၊ ဒီရိုးရာယဉ်ကျေးမှု မနောပွဲကို မဖြစ်မနေ ဦးဆောင်ကျင်းပတာဖြစ်တယ်" ဟု သူက ဆက်ပြောသည်။
ဇန်န၀ါရီလ ၁၀ ရက်နေ့သည် ကချင်ပြည်နယ်နေ့ဖြစ်သည်။ ပွဲတော်တွင် စက်မှုဝန်ကြီးဌာန အပါအဝင် ပုဂ္ဂလိက ကုမ္ပဏီများမှ ဈေးရောင်းပွဲတော်များနှင့် လောင်ကစားဝိုင်းများလည်း ပါရှိပြီး မနောမေနှင့် မနောမောင် ရွေးပွဲ ကိုလည်း ထည့်သွင်း ကျင်းပမှာဖြစ်သည်။
ထို့အပြင် Iron Cross တေးဂီတ၀ိုင်းနှင့်အတူ အဆိုတော် မျိုးကြီး၊ ၀ိုင်ဝိုင်း၊ Rဇာနည်၊ နောနော်၊ ရှင်ဖုန်း၊ မီးမီးခဲ၊ ဆုန်သင်းပါရ်နှင့် L ဆိုင်းဇီက မနက်ဖြန် ညမှ စတင်ကာ လာရောက် ဖျော်ဖြေကြမည်ဟု သိရသည်။
''ကျနော်တို့ ကေအိုင်အိုကတော့ ၁၃၀၀ ကျော် ရောက်မယ်။ မနက်ဖြန်ဆို ရောက်ပြီ။ ကချင်ပြည်နယ်နေ့ သတ်မှတ်တဲ့ရက်ပေါ့နော်။ ဒါကြောင့် နှစ်တိုင်းကျင်းပတာဖြစ်တယ်။ နောက်ပြီး ရိုးရာယဉ်ကျေးမှုတခုထဲ မဟုတ်ဘူး။ ကျနော်တို့ ကချင်ပြည်နယ်ကို တန်ဖိုးထားတာလည်း ဖြစ်တယ်" ဟု ကချင်အမျိုးသား လွတ်မြောက်ရေး တပ်မတော် (ကေအိုင်အေ) မှ ဒုတိယအတွင်းရေးမှူး ဒေါက်တာ တူးဂျာက ပြောသည်။
နှစ်စဉ်ကျင်းပသည့် ပွဲတော်သို့ မိုးကောင်း၊ မိုးညှင်း၊ နမ္မတီး၊ဟိုပင်၊ ဗန်းမော် အပါအ၀င် ကချင်ပြည်နယ်မြို့နယ် ၁၃ မြို့နယ်နှင့် ရှမ်းပြည်နယ်တွင်းက လူပရိသတ် ၅ သိန်းခန့် လာရောက်လေ့ရှိသည်ဟု ပွဲကျင်းပသူများက ပြောသည်။
ယခုနှစ်တွင် အခြားသော အပစ်အခတ်ရပ် ကချင်အဖွဲ့များနှင့် စစ်အစိုးရဘက်မှ မြောက်ပိုင်းတိုင်း စစ်တိုင်းမှူးသစ် ဗိုလ်ချုပ်စိုးဝင်းတို့ တက်ရောက်ဖွယ်ရှိသည်။
ကချင်ပြည်နယ်နေ့ကို ဗြိတိသျှလက်ထက်မှ မြန်မာပြည် လွတ်လပ်ရေးရခဲ့ပြီးနောက် ၁၉၄၈ ခုနှစ် ဇန်နဝါရီလ ၁ဝ ရက်နေ့တွင် ပထမဆုံးအကြိမ်အဖြစ် မြို့တော် မြစ်ကြီးနားရှိ စီတာပူရပ်ကွက်တွင် ကျင်းပခဲ့သည်။
သို့သော်လည်း စစ်အစိုးရလက်ထက် မနောပွဲတော်များသည် အနှစ်သာရကင်းမဲ့လာကြောင်း ပြည်ပအခြေစိုက် ကချင် ဖွံ့ဖြိုးရေးကွန်ယက်မှ ကိုအောင်ဝါက ပြောသည်။
"ဟိုတုန်းကတော့ ကချင် ပြည်နယ်နေ့ ပွဲတော်က အဓိပ္ပာယ် ပြည့်ဝမှု ရှိတာပေါ့။ အခုကတော့ နအဖ အာဏာပိုင်တွေ အလိုကျလုပ်ရတဲ့ ပွဲဖြစ်သွားတာပေါ့။ အရင် ကချင်ပြည်နယ်နဲ့ဆိုင်တဲ့ မိန့်ခွန်းတွေ ချွေတာမျိုးတွေ ရှိတယ်။ အခု ကတော့ အာဏာပိုင်တွေ ခွင့်မပြုတာ ဘာမှ မလုပ်ရတော့ဘူး ဆိုတော့ သူတို့ အလိုကျပွဲ ဖြစ်သွားတာပေါ့" ဟု ကိုအောင်ဝါက ပြောသည်။
Subscribe to:
Post Comments (Atom)
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။