သတင်း ကိုစိုး ဧရာဝတီ | ထိုင်းနိုင်ငံ ချင်းရိုင်ခရိုင် ကျိန်းသျှာန်မြို့နယ် ၀ိန်းကျောက် ရွာတွင် ကျင်းပသော မိုင်းဖုန်း ဆရာတော် ဦးဥာဏသံဝရ၏ သက်တော် ၄၆ နှစ်ပြည့် မွေးနေ့ပွဲသို့ မြန်မာနိုင်ငံမှ သံဃာတော်များ အပါအ၀င် လာရောက် ပူဇော်ကန်တော့ ကြသူပေါင်း သိန်းချီရှိကြောင်း သိရသည်။
ဇန်န၀ါရီလ ၅ ရက်နေ့တွင်ကျရောက်သော အဆိုပါ မိုင်းဖုန်း ဆရာတော်(၀န်းန်စွန့်မ်)၏ မွေးနေ့ပွဲကို မြန်မာနိုင်ငံ ရှမ်းပြည်နယ်ဘက်မှ သံဃာတော်များနှင့် ဒကာဒကာမ များစွာလာရောက်ကြသည်ဟု ယင်းမွေးနေ့ပွဲ သို့ ကိုယ်တိုင် သွားရောက်ခဲ့သည့် သျှမ်းသံတော်ဆင့် သတင်းဌာနမှ အယ်ဒီတာ ဦးစိန်ကြည်က ပြောသည်။
“ရှမ်းပြည်အနှံ့က လာကြတယ်၊ မှန်လုံကားတွေ၊ ဘင်ကား၊ ပစ်ကပ်ကားတွေ ၊ ဖိုးဝှီးကားတွေ ရာနဲ့ချီတယ်၊ အထူး သဖြင့် ရှမ်းတွေ များတယ်၊ ပလောင်တို့ မုံတို့လည်းလာကြတယ်၊ တခြား ဗုဒ္ဓဘာသာကိုးကွယ်တဲ့ ရှမ်းပြည်က လူမျိုးစုတွေလည်းလာတယ်၊ ရှမ်းပြည် ၅၆ မြို့နယ်ထဲမှာ တ၀က်ကျော်ကျော် လောက် လာတယ်ပြောတယ်၊ ၀င်လိုက်ထွက်လိုက်၊ လာလိုက်ပြန်လိုက်ပေါ့၊ အားလုံးပေါင်းဆို ၁ သိန်း လောက်ရှိ တယ်လို့ ခန့်မှန်းကြတယ်”ဟု ၎င်းက ဧရာဝတီသို့ ပြောပြသည်။
တရုတ်ပြည်ဘက်က ရှစ်ဆောင်ပနား၊ ရွှေလီတို့ရှိ ရှမ်းလူမျိုးများ၊ မြန်မာပြည် ကချင်ပြည်နယ် ဗန်းမော်ဘက်မှ လူများ လာရောက် ကြကြောင်း၊ ထိုင်းနိုင်ငံ ဘန်ကောက်၊ ချင်းမိုင်၊ ချင်းရိုင်နှင့် မဲဆောက် စသည့် ဒေသများက ထိုင်းလူမျိုးများလည်း မိုင်းဖုန်းဆရာတော် မွေးနေ့ပွဲသို့ လာရောက် ကြကြောင်းလည်း ဆိုသည်။
ယင်းဆရာတော်၏ ၃ ရက်ခန့် ကျင်းပသည့် မွေးနေ့ပွဲသို့ မြန်မာနိုင်ငံဘက်မှ လာရောက်သူများသည် တဦးလျှင် အနည်းဆုံး ထိုင်း ဘတ်ငွေ ၅၀၀၀ ခန့် ကုန်ကျစရိတ်ရှိကြောင်းသိရသည်။
ဝါတော် ၂၆ ၀ါရှိ မိုင်းဖုန်းဆရာတော်သည် ယခင်က ရှမ်းပြည်နယ် တာချီလိတ်မြို့ မိုင်းဖုန်းကျေးရွာတွင် သီတင်း သုံးနေထိုင်ရာမှ လွန်ခဲ့သည့် ၂၀၀၄ ခုနှစ်အတွင်းက ထိုင်းနိုင်ငံ ချင်းရိုင်ခရိုင် ကျိန်းသျှာန်မြို့နယ် ၀ိန်းကျောက်ရွာ သို့ ပြောင်းရွှေ့ သီတင်းသုံး နေခြင်းဖြစ်သည်ဟု ဦးစိန်ကြည်က ပြောသည်။
“ဆရာတော် မိုင်းဖုန်းမှာနေတုန်းက ဗိုလ်ချုပ်ခင်ညွန့်နဲ့ သူ့ လက်အောက်ကလူတွေ ခဏခဏလာကြတယ်၊ ဗျူဟာမှူးတို့ တိုင်းမှူးတို့လည်း လာကြတယ်၊ နောက်ပိုင်း သူနဲ့နီးစပ်တဲ့ ပစ္စည်းလေးပါး ဒကာတွေထဲက ထောက် လှမ်းရေးတွေက သတ်ပစ်တာရှိတယ်၊ တခြားအမှုကို အကြောင်းပြပြီး တော့ ပေါ့၊ ဖမ်းတာတွေလည်းရှိတယ်၊ အဲဒါ ဆရာတော်က ဗိုလ်ချုပ်ခင်ညွန့် မပြုတ်ခင်ကတည်းက ထိုင်းနိုင်ငံဘက်ကို ထွက်လာတာ၊ ၂၀၀၄ ထဲမှာ ထင်တယ်”ဟု ဦးစိန်ကြည်က ပြောဆိုသည်။
မိုင်းဖုန်းဆရာတော်သည် ငယ်စဉ်ကပင် တရားဓမ္မပွားများခြင်း၊ အကျင့်သီလ မြဲမြံခြင်းတို့ကြောင့် လူအများက လေးစား ကြည်ညို ကြကြောင်း၊ ၎င်း၏ ဟောပြောချက်များကို ကျင့်ကြံပြီး အောင်မြင် ကြီးပွားသွား သူများ ရှိကြောင်း၊ သို့သော် တန်ခိုးရှင် ပုံစံမျိုး မဟုတ်ကြောင်းလည်း ၎င်းကဆိုသည်။
Subscribe to:
Post Comments (Atom)
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။