သတင်း လွတ်လပ်သော မွန်သတင်းအေဂျင်စီ | မြန်မာရေပိုင်နက်အတွင်းသို့ တရားမဝင် ဝင်ရောက် ငါးခိုးဖမ်း နေသော ထိုင်းငါးဖမ်းလှေများကို ကော့သောင်းရှိ မြန်မာစစ်တပ်အာဏာပိုင်များက မကြာခဏ ဖမ်းဆီးရရှိပြီး ဒဏ်ငွေရိုက်ကာ ပြန်လွှတ်သည်။
အနည်းဆုံး ထိုင်းလှေတစ်ရာကျော်ခန့် နေ့တိုင်းလိုလို ခရုနှင့်ငါးပေါများသော မြန်မာရေပိုင်နက်အတွင်းသို့ ခိုးဝင်ပြီး ငါးဖမ်းနေလျက်ရှိသည်။
“နေ့တိုင်းလိုလိုပဲ ရေတပ်မဟုတ်ရင် ကြည်းတပ်က စစ်အရာရှိတွေ လိုက်ဖမ်းနေတယ်၊ အနည်းဆုံးတော့တစ်စီး နှစ်စီး အမြဲရရှိနေတယ်၊ ဒါပေမယ့် ငွေပေးနိုင်တဲ့ ထိုင်းလှေပိုင်ရှင်တွေကို ပြန်လွှတ်ပေးတယ်” ဟု ကော့သောင်းရှိ ယာယီဗျူဟာမှူး ဒုဗိုလ်မှူးကြီးဥာဏ်နိုင်နှင့် နီးစပ်သူတစ်ဦးက ပြောပြသည်။
ယမန်နေ့တုန်းက မြန်မာစစ်တပ်မှ လှေနှစ်စီးဖမ်းလိုက်ပြီး ဒဏ်ငွေဆောင်လိုက်သည့် လှေတစ်စီးကို ဒီကနေ့ မနက်တွင် ပြန်ပေးလိုက်သည်ဟု ဆိုသည်။
“ကျနော်ပဲသွားပေးတယ်၊ ဒီကတော့ ငွေတော့ သူမယူဘူး။ ဘတ်ငွေကျပ်တစ်သိန်းခွဲနဲ့ညီတဲ့ ဆိုင်ကယ်တို့တ ချို့ပစ္စည်းတို့ပဲယူတယ်” ဟု လှေသွားရွေးပေးသော မြန်မာလှေပိုင်ရှင်တစ်ဦးက ရှင်းပြပေးသည်။
“လှေကိုတော့သူတို့ သိမ်းယူလိုက်မယ့်ပုံပဲ၊ တရက်အတွင်းမှာပဲ ဆေးအပြီးသုတ်ပစ်လိုက်တယ်၊ ကျနော်တို့က လိုက်မီလို့ ပြန်ရတဲ့သဘောဖြစ်တာပေါ့ဗျာ” ဟု မြန်မာလှေပိုင်ရှင်က ဆိုသည်။
မြန်မာဘက်မှာရှိသော ခရုကောင်များသည် ထိုင်းငါးဖမ်းလှေများအတွက် မက်လုံးများဖြစ်နေပြီး တစ်ညအတွင်း ခရုခိုးဖမ်းသည့် ထိုင်းလှေများသည် အနည်းဆုံး ဘတ်ငွေ ၆ သောင်း ဝင်သည့်အတွက် ၄င်းတို့အတွက် အလုပ် ဖြစ်နေသည်။
ခရုနှင့်ငါး ပေါသော မြန်မာရေပိုင်နက်အတွင်း ထိုင်းငါးဖမ်းကုမ္ပဏီများက တရားဝင်စာချူပ်နှင့်လည်းကောင်း နယ်မြေခံစစ်တပ်နှင့်နားလည်မှုယူ၍လည်းကောင်း ငါးဖမ်းယူလေ့ရှိသည်။
တရားဝင်ထိုင်းငါးဖမ်းလှေတွင် ဝင်ရောက်ဦးဆောင်လုပ်ကိုင်နေသော မြန်မာရေလုပ်သားတစ်ဦးက တရားဝင် စီမံကိန်းနှင့် ငါးဖမ်းနေသော ထိုင်းစက်လှေပေါင်း သုံးရာကျော်ရှိပြီး လာမည့်ဧပြီလတွင် သက်တမ်းကုန်ဆုံးမည် ဖြစ်သည်။ နှစ်နိုင်ငံစီမံကိန်းအရ လုပ်ပိုင်ခွင့် ၅ နှစ်သဘောတူထားသည်။
နားလည်မှုနှင့် ခွင့်ပြုထားသော ထိုင်းငါးဖမ်းလှေများကို တစ်လလျှင် မြန်မာစစ်တပ် ၆ လုံးထိုးတပ် စက်လှေ များကို ဘတ်ခြောက်သောင်းနှင့် ၄ လုံးထိုးတပ် စက်လှေငယ်များကို ၅ သောင်း တောင်းယူခဲ့သည်။
သို့သော်လည်း မြန်မာရေတပ်နှင့် စစ်တပ်တို့က ၎င်းတရားဝင်ငါးဖမ်းသင်္ဘောလုပ်သားများနှင့် နားလည်မှုဖြင့် ခွင့်ပြုထားသော ကေတီနံပတ်ရှိ ငါးဖမ်းလှေလုပ်သားများအပေါ်တွင် ဆီ၊ ငွေနှင့်အစားသောက်ပစ္စည်းများကို အဓမ္မတောင်းယူလေ့ရှိသည်။
“ဒါကတော့ သူတို့အတွက်စားပေါက်ပါပဲ၊ မရတဲ့အဆုံးတော့ ဆန်တောင် တောင်းစားနေတယ်” ဟု ထိုင်းကုမ္ပဏီ တွင် ဦးဆောင်အလုပ်လုပ်နေသော မြန်မာရေလုပ်သားက ဆိုသည်။
သတ်မှတ်ထားသည့် ရေဧရိယာပြင်ပတွင် ဝင်ရောက်သော ကေတီနံပတ်လှေများကို လိုသလိုဒဏ်ငွေရိုက် လျက်ရှိပါသည်။
“နားလည်မှုနဲ့လုပ်ထားတာကတော့ ငါ့ရဲအသိတွေပဲ၊ လှေပေါင်း အစီး ၃၀ လောက်ရှိတယ်၊ ဒီလို ကေတီနံပတ် ပေးထားတာကတော့ လှေအစီးပေါင်း ရာနဲ့ချီပြီးရှိတယ်၊ ဒါဟာ ဒေသခံစစ်တပ်ရဲ့ အဓိကဝင်ငွေပဲ” ဟု ယာယီဗျူဟာမှူးနှင့် နီးစပ်သူက ပြောသည်။
ရရှိထားသော ငွေများကို စစ်တပ်နှင့် ဒေသအာဏာပိုင်များက ဝေစုအလိုက်ခွဲကြရသည်ဟု ဆိုသည်။ လွန်ခဲ့ သော သုံးလမှစပြီး မြန်မာ အာဏာပိုင်များက ခရုဖမ်းဆီးမှုကို ပိတ်ပင်ထားလိုက်ပြီး ခရုခိုးဖမ်းသူများကိုလည်း အနည်းဆုံးထောင်ဒဏ် ၂၀ နှစ် ချမှတ်မည် ဟုလည်း ထုတ်ပြန်ထားသည်။
သို့သော်လည်း ခရုခိုးဖမ်းမှုများဆက်လက်ရှိနေသလို ဗုံးဖောက်ပြီး ငါးဖမ်းသူများလည်း ဆက်လက်ရှိနေ ဆဲပင် ဖြစ်သည်။
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။