ဒီရေ သတင်းများ

သတင်း သဲသဲနှင့် ဇာနည် မဇ္ဈိမ | နာဂစ်မုန်တိုင်းကျပြီးနောက် နိုင်ငံခြား ခရီးသွားလာရေး ကျဆင်းမှု အပါအ၀င် ၂၀၀၈ ခုနှစ်အတွင်း မြန်မာနိုင်ငံသို့ လာရောက်သော ခရီးသွားများမှာ ယမန်နှစ်ကထက် ၂၅ ရာခိုင်နှုန်း လျော့ကျသွားကြောင်း ဟိုတယ်နှင့် ခရီးသွားလာရေး ၀န်ကြီးဌာန၏ စာရင်းအရ သိရသည်။

၂၀၀၇ ခုနှစ်အတွင်း လာရောက်သော ကမ္ဘာလှည့်ခရီးသည် ၂၄၈ ၀၇၆ ဦး ရှိခဲ့သော်လည်း၊ ၂၀၀၈ ခုနှစ် ဇန်န၀ါရီလမှ ဒီဇင်ဘာလကုန်အထိ လာရောက်သည့် ဦးရေမှာ ၁၉၃ ၃၁၉ ဦးသာရှိခဲ့ရာ ခရီးသည် ၅ သောင်း ကျော် ကျဆင်းသွားကြောင်း သိရခြင်း ဖြစ်သည်။

"အဓိက ၀င်တာက လေဆိပ်ကဖြစ်တော့ နာဂစ်ဖြစ်တုန်းက လေဆိပ်ပိတ်ရတာရယ်၊ နောက်ပြီးတော့ ထိုင်းမှာ လေဆိပ်ပိတ်လိုက်တော့ ဒီဘက်ကို ဧည့်သည်တွေ ကူးဖို့က ရက်ပိုင်းလောက် ရပ်သွားတဲ့အချိန်တွေမှာ ဧည့်သည်က ထိုးကျသွားတယ်။ နောက် ကမ္ဘာ့စီးပွားရေး ကျပ်တည်းလာတာတွေပေါ့" ဟု ၀န်ကြီးဌာနမှ အမည်မဖော်လိုသူ အရာရှိတဦးက မဇ္ဈိမကို ပြောပြသည်။

ဟိုတယ်နှင့် ခရီးသွားလာရေး ၀န်ကြီးဌာနမှ ကနဦး ထုတ်ပြန်ခဲ့သော အစီရင်ခံစာတခုအရ ၂၀၀၇ ခုနှစ်အတွင်း ၀င်ရောက်သော ခရီးသွားဦးရေမှာ ခရီးသွားလုပ်ငန်းများ တရှိန်ထိုးတက်လာခဲ့သော ၂၀၀၆ ခုနှစ်ကထက် ၅ ဒဿမ ၉ ရာခိုင်နှုန်း ကျဆင်းခဲ့သည်ဟု ဖော်ပြထားရာ ၂၀၀၈ ခုနှစ်အတွင်း ကျဆင်းမှုမှာ ပိုမိုဆိုးလာကြောင်း ပြသနေသည်။

ဝန်ကြီးဌာန အရာရှိက "ခရီးသွားလုပ်ငန်း ထိခိုက်ရင် ဟိုတယ်လုပ်ငန်းကိုလည်း ထိခိုက်တယ်။ နောက် ခရီးသွားလုပ်ငန်းကို မှီခိုနေရတဲ့ လူတွေကလည်း အကုန် ထိခိုက်ကုန်တယ်လေ" ဟု ဆိုသည်။

ပြည်တွင်းသို့ လာရောက်သော ကမ္ဘာလှည့်ခရီးသည်များ ကျဆင်းသွားခြင်းကြောင့် ပြည်တွင်းမှ ခရီးသွား လုပ်ငန်းများအဖို့ ၂၀၀၈ ခုနှစ်သည် အရှုံးများနှင့် ရင်ဆိုင်ရသော နှစ်တခုဖြစ်သည်။

နာဂစ်မုန်တိုင်း တိုက်ခတ်ခဲ့သည့် ၂၀၀၈ ခုနှစ် မေလမှ စတင်ကာ ခရီးသွားလုပ်ငန်း ကုမ္ပဏီအချို့မှာ ၀င်ငွေကျဆင်းကာ ၅၀ ရာခိုင်နှုန်းခန့်ပင် အရှုံးပေါ်ခဲ့ရကြောင်း သိရသည်။

ဥရောပတိုက်သား ကမ္ဘာလှည့်ခရီးသွားများကို အဓိကထားသည့် အမည်မဖော်လိုသည့်ူ ခရီးလုပ်ငန်း ကုမ္ပဏီတခုမှ မန်နေဂျင်း ဒါရိုက်တာတဦးက "နာဂစ်ဖြစ်ကာစ ၅ လလောက်က ဧည်သည့်မရှိဘူး။ နောက်ပြီး နှစ်ကုန်တော့ လိုင်စင်တိုးဖို့ရယ်၊ အခွန်ကိစ္စတွေရယ် ပေါင်းလိုက်တော့ ဒီနှစ် ထက်ဝက်လောက် ရှုံးတယ်" ဟု မဇ္ဈိမကို ပြောသည်။

ဥရောပ၊ အမေရိကနှင့် အာရှဒေသမှ ခရီးသွားများကို ၀န်ဆောင်မှုပေးနေသော ရန်ကုန်မြို့မှ အခြား ခရီးသွားလုပ်ငန်းကြီး တခုကလည်း ၂၀၀၈ အတွက် ခရီးသည် လက်ခံရမှုမှာ ယခင်နှစ်ကထက် ၃၅ မှ ၄၀ ရာခိုင်နှုန်းအထိ ကျသွားခဲ့သည်ဟု ဆိုသည်။

စက်တင်ဘာ လူထုလှုပ်ရှားမှုများ ဖြစ်ပေါ်ရာ ၂၀၀၇ ခုနှစ်မှစ၍ မြန်မာ့နိုင်ငံရေး မတည်ငြိမ်မှုများဂယက်ကြောင့် ခရီးသွားလုပ်ငန်းများ ကျဆင်းလာခဲ့ရာ ၂၀၀၈ ခုနှစ်က ဖြစ်ပေါ်ခဲ့သော နာဂစ်မုန်တိုင်းနှင့် အိမ်နီးချင်း ထိုင်းနိုင်ငံရေး ပြဿနာများနှင့် ကမ္ဘာ့ဘဏ္ဍာရေး အကျပ်အတည်း ပြဿနာက ခရီးသွားလုပ်ငန်းကို ပိုမိုကျဆင်းစေရာ အကြောင်းများ ဖြစ်လာခဲ့သည်။

ဂျာမဏီ ခရီးသွားကုမ္ပဏီမှ ပြောရေးဆိုခွင့်ရှိသူက "ထိုင်းမှာ လေဆိပ်ပိတ်တဲ့ရက်ပိုင်းက ခရီးစဉ်တွေ အကုန်ပျက်ကုန်တယ်။ နောက်လာမယ့် ခရီးစဉ်တွေကိုပါ ဒီ ဇန်န၀ါရီအထိကို ပျက်သွားတာတွေ ရှိတယ်။ ရှားရှားပါးပါးလေး ရထားတဲ့ အဖွဲ့စုစုပေါင်း ၁၀ ဖွဲ့လောက်ရှိတယ်လေ" ဟု ရှင်းပြသည်။

တသီးပုဂ္ဂလ နိုင်ငံခြားသားခရီးသွား ဧည့်လမ်းညွှန်တဦးကလည်း "ခါတိုင်းနှစ်က ကျနော်တို့လည်း အလုပ်ဖြစ်တယ် အိမ်မှာနေရတယ် မရှိဘူး။ ဒီနှစ်တော့ အေဂျင်စီတွေက သူတို့ဧည့်လမ်းညွှန်တွေတောင် အဆင်ပြေအောင် မနည်းလုပ်နေရတော့ ကျနော်တို့ကို ဧည့်သည် မပေးနိုင်တော့တာ ကြာပြီ" ဟု မဇ္ဈိမကို ပြောသည်။

၂၀၀၈ ခုနှစ် မြန်မာနိုင်ငံ ခရီးသွားရာသီတွင် ၄င်းအနေနှင့် လက်ခံရသည့် ဧည့်ခရီးစဉ်မှာ ၂၀၀၇ ခုနှစ်ထက် ၄၀ရာခိုင်နှုန်းကျော် လျော့ကျသွားပြီး ယခုအခါ ဧည့်သည် အနည်းငယ် ပြန်ဝင်လာသည်ဟု ဆိုသော်လည်း မြန်မာ့ခရီးသွားလုပ်ငန်း၏ ယခင်နှစ် အခြေအနေကို မီရန်ပင် ခဲယဉ်းဖွယ်ရှိသည်ဟု သူက ဆက်လက် သုံးသပ်သည်။

ပြင်သစ်နှင့် ဂျာမဏီ ဈေးကွက်ကို ဦးတည်လုပ်ဆောင်နေသော ခရီးသွားလုပ်ငန်းမှ ဈေးကွက်မန်နေဂျာက "အခုနှစ်ကတော့ အရှုံးခံပြီး အလုပ်ဖြစ်အောင်ဆိုပြီးတော့ ဈေးတွေ လျှော့ချရောင်းရတာပေါ့နော်။ ဒီအတိုင်း ဆက်သွားမယ်၊ အခြေအနေတွေက ဒီထက်ဆိုးလာမယ်ဆိုရင်တော့ ၂၀၀၉ မှာ လာမယ့် ခရီးသွားရာသီက ဆက်ကျနေမှာပဲ" ဟု ဆိုသည်။

ခရီးသွားလုပ်ငန်းများ ကျဆင်းမှုသည် ဆက်စပ်နေသော ဟိုတယ်လုပ်ငန်းများ၊ စားသောက်ဆိုင်များ၊ အမှတ်တရပစ္စည်း အရောင်းဆိုင်များနှင့် ကားအငှားလုပ်ငန်းများကိုပါ ထိခိုက်စေခဲ့သည်။

ရန်ကုန်မြို့ ကုန်သည်ကြီးများ ဟိုတယ်မှ မန်နေဂျာတဦးက "တရုတ်၊ ထိုင်း၊ ကိုရီးယား စတဲ့ အာရှ ဧည့်သည် တွေတော့ ၀င်ကြပါတယ်။ နည်းတော့ နည်းတာပေါ့နော်။ နောက် ခရီးသွားကုမ္ပဏီတွေက တင်တဲ့ အဖွဲ့တွေတော့ တော်တော်လေးကို ကျသွားတယ်။ ဧည့်သည်ပါးတယ်ပေါ့" ဟု ဆိုသည်။

ခရီးသွားလုပ်ငန်းသုံးယာဉ်များ အငှားလုပ်ငန်းတခုအဆိုအရ ၂၀၀၈ ခုနှစ် ခရီးသွားရာသီအတွင်း ကားအငှား လုပ်ငန်းမှ ၀င်ငွေရရှိမှုမှာ ယခင်နှစ်ထက် ၃၀ ရာခိုင်နှုန်း ကျဆင်းသွားသည်ဟု သိရသည်။

ကမ္ဘာလှည့်ခရီးသည်များ အများဆုံးစိတ်ဝင်စားရာ ရှေးဟောင်းမြို့တော် တခုဖြစ်သည့် ပုဂံသို့လည်း ခရီးသည် လာရောက်မှု နည်းပါးမှုကြောင့် ပုဂံမှ ယွန်းထည်ပစ္စည်းဆိုင်များလည်း ရောင်းအားများကျဆင်းကြောင်း သိရသည်။

"ဒီနှစ်က အရောင်းကျသွားတော့ ကျမတို့ ပစ္စည်းသစ် သိပ်မထုတ်ဖြစ်ဘူး။ ရှိထားပြီးသားကိုပဲ ကုန်အောင်ရောင်း နေရတာမျိုးဆိုတော့လေ။ အော်ဒါထည်တွေတော့ လုပ်ဖြစ်ပါတယ်။ ရောင်းအားကတော့ အရင်ကထက် တ၀က်လောက်ကို ကျသွားတယ်။ တနိုင်လုပ်ကြတဲ့ လုပ်ငန်းလေးတွေက ပိုထိကြတယ်" ဟု ပုဂံမှ ယွန်းထည် လုပ်ငန်းရှင်တဦးက ဆိုသည်။

ဖြစ်ပေါ်နေသည့် ကမ္ဘာ့စီးပွားရေး အခြေအနေတို့ကြောင့် ၂၀၀၉ ခုနှစ်အတွင်း မြန်မာ့ခရီးသွားလုပ်ငန်း ပြန်လည်ဦးမော့လာရန် မျှော်လင့်ချက် နည်းနေသည်ဟု စီးပွားရေး ပညာရှင်တဦးဖြစ်သူ ဦးခင်မောင်ကြည်က သုံးသပ်သည်။

သူက "တကမ္ဘာလုံးက အထွေထွေ စီးပွားရေးကလည်း ကျနေတာဆိုတော့ ခရီးသွားတွေ လာဖို့ဆိုတာက ပိုက်ဆံ တော်တော်သုံးနိုင်မှဆိုတော့ ဗမာပြည်အနေနဲ့က လာပါ့မလားဆိုတာပေါ့။ ဗမာပြည်အနေနဲ့ကတော့ ပြန်တက် လာဖို့က မျှော်လင့်ချက်ဝေးပါတယ်။ ခရီးသွားဆိုတာက ပိုက်ဆံတော်တော်ရှိမှ သွားလာနိုင်တာကိုး။ နိုင်ငံခြားသားတွေ လာနေတာက အမေရိကန်တွေ၊ ဥရောပသားတွေ။ အခု အဲဒီ လူတွေက နည်းသွားမှာပေါ့" ဟု ဆိုသည်။

မြန်မာ့ခရီးသွားလုပ်ငန်းအတွက် အမြတ်ဝင်ငွေ အများဆုံး ရရှိသော ကမ္ဘာလှည့်ခရီးသည် အများစုမှာ ဥရောပနှင့် အမေရိကားမှ လာရောက်သူများ ဖြစ်ကြသည်။

ထို့အတူ မြန်မာနိုင်ငံသို့ ၀င်ရောက်ရာတွင် ထိုင်းနိုင်ငံ ဘန်ကောက်မြို့ လေဆိပ်များမှတဆင့် လေကြောင်းလိုင်းဖြင့် ၀င်ရောက်မှုမှာ အများဆုံးဖြစ်၍ အိမ်နီးချင်းနိုင်ငံများ မငြိမ်မသက်ဖြစ်မှုများ၏ ဂယက်များကလည်း ပြည်တွင်းခရီးသွားလုပ်ငန်းများအပေါ် အကျိုးသက်ရောက်မှုများ ဖြစ်ပေါ်လာနိုင်သည်ဟု သူက သုံးသပ်သည်။

"၂၀၀၈ တုန်းက ထိုင်းမှာ လေဆိပ်ကို ပိတ်ထားတာတွေဖြစ်တယ်။ နောက် အိန္ဒိယက အကြမ်းဖက်တာတွေ ဖြစ်တာတွေပေါ့။ အဲဒါတွေက တိုက်ရိုက်ရော သွယ်ဝိုက်ပြီးတော့ရော ထိတာပေါ့။ ၂၀၀၉ မှာက ဘာဖြစ်မလဲ မသိနိုင်ဘူး။ ဖြစ်လာခဲ့ရင် ဒါက ဗမာပြည်ကိုလည်း ထိတာပေါ့" ဟု သူက ပြောသည်။

ဟိုတယ်ခရီး ၀န်ကြီးဌာနမှ အရာရှိကလည်း "ဦးတို့ဘက်ကတော့ တတ်နိုင်သမျှ ပြန်တက်လာအောင်တော့ ခရီးသွားမြှင့်တင်ရေးတွေ လုပ်မှာပေါ့နော်။ ဒါပေမဲ့ စီးပွားရေးတွေ ကျပ်နေတာတွေ ဘာတွေဆိုတော့ ၂၀၀၉ အတွက်က ဘယ်လိုဖြစ်လာမလဲဆိုတာ မခန့်မှန်းနိုင်ဘူးပေါ့။ တက်လာဖို့ပဲ အကောင်းဘက်က မျှော်မှန်း ရတာပေါ့" ဟု ပြောသွားသည်။