ဒီရေ သတင်းများ

သတင်း NEJ ခေတ်ပြိုင် | ရန်ကုန်တွင် စီအန်ဂျီပြောင်းပြီးသော စီးတီးတက္ကစီများ၌ တက္ကစီမီတာ တပ်ဆင်မှု ပြုလုပ်ထားသော်လည်း မီတာကို အသုံးမပြုဘဲ မောင်းနှင်သည်ကို တွေ့ရှိပါက လုပ်ငန်းလိုင်စင်သိမ်းကာ စီးတီးတက္ကစီအဖြစ်မှ ပယ်ဖျက်မည်ဖြစ်သည်ဟု ရန်ကုန်ရှိ တက္ကစီမောင်းသူများထံမှ သိရသည်။

“အစိုးရကတော့ ရာဇသံနဲ့ အာဏာတွေ အပြည့်သုံးနေပြီဗျာ။ ဘယ်လိုမှ ဒီမီတာကို သုံးလို့မှ မရတာဗျ။ စီးတဲ့လူ၊ မောင်းတဲ့လူ ဒီနှစ်ယောက်ရဲ့ နားလည်မှုနဲ့ပဲ လုပ်နေကြတာပဲ။ ခရီးနီးရင် မီးပွိုင့်စောင့်ရတာနဲ့၊ ယာဉ်ကြောကြပ် လို့ ကြာတာနဲ့၊ အဲဒီအချိန်တွေကို စောင့်ဆိုင်းနေရတာလည်း ငွေက တက်နေတာပဲ။ မြို့တွင်းကနေ တာမွေကို ငှားစီးမယ်ဆိုရင် မီတာနဲ့ (၁,၃၀၀) လောက်ပေးရတယ်။ မီတာမပြရင် (၁,၂၀၀) နဲ့ပြတ်တယ်။ ဒါ ဥပမာတခုပါ” ဟု စီးတီးတက္ကစီမောင်းသူတဦးက ပြောသည်။

ယာဉ်စည်းကမ်း ထိန်းသိမ်းရေး ကော်မတီက ထုတ်ပြန်ထားသည်မှာ စီအန်ဂျီပြောင်းပြီး ယာဉ်စာရင်းနှင့် မီတာ တပ်ဆင်ပြီး ယာဉ်စာရင်း တို့ကို တိုက်ဆိုင်စစ်ဆေးပြီး ကညန ကုန်လမ်းပို့ဆောင်ရေး ညွှန်ကြားမှူး ဦးစီးဌာနကို ပေးပို့ကာ မီတာမပြဘဲ မှောင်းနှင်ခြင်း ရှိ မရှိ စာရင်းကိုက်ညှိပြုစုကာ မီတာမပြသည်ကို တွေ့ရှိပါက ကညနမှ လုပ်ငန်းလိုင်စင် သက်တမ်း ခွင့်မပြုခြင်း၊ လိုင်စင်အနီမှာ ကိုယ်ပိုင် နံပါတ် အနက်ကို ပြောင်းပစ်မည်ဖြစ်ခြင်းနှင့် စီးတီးတက္ကစီမှ ပယ်ဖျက်ခြင်းတို့ကို ဆောင်ရွက်မည်ဖြစ်သည်ဟု သိရသည်။

စီအန်ဂျီပြောင်းလဲပြီးသော စီးတီးတက္ကစီယာဉ်များကို မီတာတပ်ဆင်ရမည်ဟု ပြီးခဲ့သည့် ဇန်န၀ါရီ (၁) ရက်နေ့က LYNX Co.Ltd၊ Aye Family Co.Ltd၊ SAKURA Co.Ltd၊ ASIA Value Co.Ltd၊ Champion Co.Ltd တို့ထံတွင် မီတာတပ်ကြရန် အာဏာဖြင့် ညွှန်ကြားခဲ့ခြင်း ဖြစ်သည်။

“မီတာတပ်ရင် တခု (၁) သိန်းကို အရစ်ကျနဲ့ ပေးရတယ်။ (၃) ရစ် ကြေပေါ့ဗျာ။ စ၀ယ်တာနဲ့ (၁) သိန်း ပေးရတယ်။ ဒီငွေတွေကို ရင်းနှီးထားရတာ အလကား အဓိပ္ပာယ်မရှိဘူး။ အစိုးရ မိသားစု အသိုင်းအ၀န်း ကုမ္ပဏီတွေချည်း ပေါင်းစားကြတော့ မြို့တော် အဆင့်မြှင့်တင်ရေးမှာ စီးတီးတက္ကစီကို မီတာတပ်တာက အရေးပါသလား၊ လမ်းတွေကျတော့ ပစ်ထားပြီးတော့ ပြောရရင်တော့ ကျနော်တို့တွေက အာဏာရှင်အောက်က လူတွေပါဗျာ” ဟု တက္ကစီ မောင်းသူတဦးက ပြောသည်။

ယခုအခါ ရန်ကုန်တွင် စီးတီးတက္ကစီစီးရေ (၁၅,၅၀၀) ကျော်ရှိသည့်အနက် စီအန်ဂျီပြောင်းလဲပြီး ယာဉ်မှာ (၁၂,၂၀၀) ကျော်ရှိကြောင်း၊ ယင်းတွင် မီတာတပ်ဆင်ပြီးယာဉ် (၉,၈၀၀) ရှိကြောင်း သိရသည်။

မီတပ်တပ်ဆင်ရန် ကျန်သော စီအန်ဂျီယာဉ်များကို အဆိုပါ ကုမ္ပဏီများတွင် သွားရောက်တပ်ဆင်ကြရန် စီးတီး တက္ကစီ ယာဉ်ပိုင်ရှင် များအား နောက်ဆုံး သတိပေးထားကြောင်း သိရသည်။