ဘူးသီးတောင် ထောင် အကျဉ်းသား ရပိုင်ခွင့် ကန့်သတ်

ခင်ဦးသာ | ထောင်ဖောက်၍ ထွက်ပြေးရန် အကျဉ်းသား တချို့က ကြံစည်သည် ဆိုသော သတင်းကြောင့် ရခိုင်ပြည်နယ်၊ ဘူးသီးတောင်ထောင်ရှိ နိုင်ငံရေး အကျဉ်းသားများမှာ ပုံမှန်ရနေကျ အခွင့်အရေးများ မရတော့ကြောင်း သိရသည်။

ဘူးသီးတောင်ထောင် (ဓာတ်ပုံ - Narinjara)

“ထောင်ဖောက်ဖို့ ကြံစည်တယ် ဆိုတဲ့ သတင်းကြောင့် ကိုဌေးကြွယ်နဲ့အတူ တခြားနိုင်ငံရေး အကျဉ်းသားတွေ၊ ရိုးရိုး အကျဉ်သားတွေဟာ သူတို့ ခါတိုင်းလုပ်နေကျ လမ်းလျှောက်တာတို့၊ စကားပြောတာ တို့ကို အရင်လို မရတော့ဘူး”ဟု ကိုဖြိုးမင်းသိန်း က ဧရာဝတီကို ပြောသည်။

ကိုဖြိုးမင်းသိန်းသည် ပြည်ထောင်စု ဒီမိုကရေစီပါတီ (UDP) ဥက္ကဌ ဟောင်း တဦးဖြစ်ပြီး ၈၈ မျိုးဆက်ကျောင်းသား ခေါင်း ဆောင် ကိုဌေးကြွယ်၏ ယောက်ဖတော်စပ်သူလည်း ဖြစ်သည်။ ၎င်းသည် ပြီးခဲ့သည့် သြဂုတ်လအတွင်း ကိုဌေးကြွယ်အား ထောင်ဝင်စာ သွားတွေ့ ထားသူဖြစ်သည်။

ထောင်ဖောက်၍ ထွက်ပြေးရန် အကျဉ်းသား တချို့ ကြံစည်သည် ဆိုသော သတင်းသည် ပြီးခဲ့သည့် တပတ်ကျော်က ဖြစ်ပေါ်ခဲ့ကြောင်း၊ ထိုသို့ ကြံစည်သူများမှာ ထောင်ဖောက်ရန် ကြံစည်သည့် ပြစ်မှုဖြင့် ဘူးသီးတောင် ထောင်သို့ မကြာမီက ပြောင်းရွှေ့ ခံထားရသူများ ဖြစ်ကြောင်း ကိုဖြိုးမင်းသိန်းက ပြောပြသည်။

ယခုအခါ ထိုသူများအား ခေါ်ယူစစ်ဆေးမှုများ ဆက်တိုက်လုပ်နေခြင်းကြောင့် နိုင်ငံရေး အကျဉ်းသားများနှင့် တခြားသော အကျဉ်းသားများကို ခေါ်ယူမေးမြန်းမှု၊ ပုံမှန်ရနေသည့် အခွင့်အရေးများ ကန့်သန့်မှုများကို ထောင်အာဏာပိုင်များက အရေးတကြီး လုပ်ဆောင်နေကြောင်းလည်း သိရသည်။

ဘူးသီးတောင် ထောင်သည် နာမည်ဆိုးသတင်းများနှင့်ကျော်ကြားသော ထောင်တခုဖြစ်သည့် အပြင် လာဘ်စားမှု ပြဿနာ များကြောင့် ထောင်အာဏာပိုင်များ မကြာခဏ နေရာပြောင်းခံရခြင်း၊ အရေးယူခံရခြင်းများ ရှိကြောင်း ဒေသခံများက ပြောသည်။

ဘူးသီးတောင်ထောင်တွင် ၈၈ မျိုးဆက်ကျောင်းသားခေါင်းဆောင် ကိုဌေးကြွယ် အပါအ၀င် ကိုစည်သူမောင်၊ ကိုအောင်ဇော် ဦး၊ ကိုမြတ်သူနှင့် ရွှေဝါရောင်တော်လှန်ရေးတွင် ပါဝင်ခဲ့သည့် မင်္ဂလာတောင်ညွန့်မှ ဆရာတော် တပါး ရှိကြောင်း သိရသည်။

ဘူးသီးတောင် ထောင်ကဲ့သို့ သံတွဲ အကျဉ်းထောင်တွင်လည်း နိုင်ငံရေး အကျဉ်းသားများနှင့် တခြား ထောင်သားများမှာ စား ၀တ်နေရေး ခက်ခဲမှုပြဿနာကို ယခုရက်ပိုင်းတွင် ဆိုးဆိုးဝါးဝါး ကြုံတွေ့ နေရကြောင်း ထောင်နှင့် နီးစပ်သူများက ပြောသည်။

သံတွဲ အကျဉ်းထောင်တွင် ထောင်ဒဏ် ၆၅ နှစ် ချခံထားရသော ၈၈ မျိုးဆက် ကျောင်းသား ခေါင်းဆောင် တဦးဖြစ်သူ ကိုကိုကြီး၊ ကိုဝင်းမော်နှင့် နိုင်ငံရေးအကျဉ်းသား ၁၅ ဦးဝန်းကျင်ရှိကြောင်း ထိုင်းနိုင်ငံ အခြေစိုက် နိုင်ငံရေး အကျဉ်းသားများ ကူညီ စောင့်ရှောက်ရေး အသင်း(AAPP) ၏ အတွင်းရေးမှူး ကိုတိတ်နိုင်က ပြောသည်။

သံတွဲထောင်၏ ထောင် အာဏာပိုင်များက ထောင်တန်းစီးများနှင့် ပူးပေါင်း၍ အိပ်ရန် နေရာတခုကို ကျပ် ၄ သောင်း၊ ၅ သောင်းထိ ရောင်းစား နေကြောင်း ထောင်ဝင်စာ သွားတွေ့ခဲ့သည့် အမျိုးသမီး တဦးကို ကိုးကား၍ ပြည်ပ အခြေစိုက် နိရဉ္စရာ ဌာန တွင် ရေးသားထားသည်။

နိုင်ငံရေး အကျဉ်းသား ဖြစ်ခဲ့ဖူးသူ တဦးက“ထောင်တွေမှာ နေရာ ရောင်းစားတာတို့၊ မြေနေရာငှားစားတာတို့ တွေက မြန်မာ နိုင်ငံက ထောင် အများစုမှာ ရှိပါတယ်၊ ဒါပေမယ့် အခုကိစ္စက ဈေးကြီးလွန်းတယ်”ဟု ဆိုသည်။

သံတွဲထောင်ရှိ အကျဉ်းသားများ အတွက် အစားအစာ များမှာလည်း လတ်ဆတ်မှု မရှိဘဲ ရက်လွန် အစားအစာများ ဖြစ်ကြောင်း၊ အာဏာပိုင် များ၏ ထောင်တွင်း စီးပွားရေးဖြစ်သော မွေးမြူရေး လုပ်ငန်းများကိုလည်း အကျဉ်းသားများအား အတင်းအကျပ် ခိုင်းစေမှုများ ရှိကြောင်းလည်း သိရသည်။

“ပြီးခဲ့တဲ့ လကလည်း ထောင်တွင်းမှာ ၀မ်းပျက်တာတို့၊ ၀မ်းလျှောတာတို့တွေ ဖြစ်ကြသေးတယ်၊ အဓိက အစားအသောက် တွေကြောင့်ပါ”ဟု ၈၈ ကျောင်းသားခေါင်းဆောင် ကိုကိုကြီး၏ ဇနီး ဒေါ်မြင့်သောင်းက ဧရာဝတီကို ပြောသည်။

လက်ရှိတွင် ကိုကိုကြီး၏ ကျန်းမာရေး အခြေအနေမှာ အစာအိမ် ရောဂါ ဖြစ်နေကြောင်းလည်း ၎င်းက ဆက်ပြောသည်။

မြန်မာနိုင်ငံရှိ အကျဉ်းထောင်များ အတွင်း နိုင်ငံရေး အကျဉ်းသားပေါင်း ၂၁၇၁ ဦးရှိကြောင်း AAPP ၏ ထုတ်ပြန်ချက် အရ သိရသည်။

source by : ဧရာဝတီ