ဒီရေ သတင်းများ

“မြန်မာ့အလင်းမှာ ရေးသားထားသလို ကျနော်တို့ ပူးတွဲဆောင်ရွက်ဖို့ နေနေသာသာ အဲဒီ ကိုညီညီအောင် ဆိုသူကို ကျနော်တို့ မရင်းနှီးရုံမကဘူး၊ သိကို မသိပါဘူး ခင်ဗျာ။ KNU တပ်မ ၆ မှာ ဖွဲ့စည်းတယ် ဆိုတာလည်း လုံးဝ မဟုတ်ဘူး။ စိတ်ကြွဆေး အရောင်းအဝယ် လုပ်မယ်ဆိုတာကလည်း အခုလက်ရှိလည်း မလုပ်သလို နောင်လည်း လုပ်ဆောင်ဖို့ မရှိပါဘူး” ဟု AASYA အတွင်းရေးမှူးက ပြောသည်။

ယနေ့ထုတ် AASYA ၏ ကြေညာချက်တွင် အကြမ်းဖက်သမားဟု စွပ်စွဲမှုသည် မဟုတ်မှန်သလို၊ ညီညီအောင်နှင့် ပတ်သက် ဆက်စပ်မှု မရှိကြောင်းနှင့် ပြည်တွင်း၌ အပြစ်မဲ့ ကျောင်းသားလူငယ်များ အဖမ်းခံနေရခြင်းအပေါ် ဗုံးဖောက်ခွဲမှု၊ အကြမ်းဖက်မှုနှင့် ဆက်နွယ်သည်ဟု သတင်းစာ စွပ်စွဲချက်သည်လည်း မမှန်ကန်ကြောင်း ငြင်းဆိုထားသည်။ ထို့အပြင် ထိုအရာများသည် မလုပ်ထိုက်သည့် အရာများဖြစ်ပြီး၊ နိုင်ငံရေး ပြသာနာများသည် နိုင်ငံရေးနည်းဖြင့် ဖြေရှင်းရန် လိုအပ်သည်ဟု ဆိုထားသေးသည်။

မြန်မာပြည်ဖွားဖြစ်ပြီး ယခုအခါ အမေရိကန် နိုင်ငံသားဖြစ်သူ ကိုညီညီအောင်သည် ယခုလ ၃ ရက်နေ့တွင် မြန်မာပြည်သို့ လေကြောင်းခရီးဖြင့် ဝင်ရောက်စဉ် အဖမ်းခံရချိန်မှစ၍ စစ်ကြောရေး စခန်းများ၌ နှိပ်စက် စစ်ဆေးခံခဲ့ရပြီး၊ နောက်ဆုံးတွင် ရန်ကုန် အင်းစိန်ထောင်၌ ချုပ်နှောင် ဖမ်းဆီးခံထားရသည်။

သူ့ကို ထိုင်းနိုင်ငံမှတဆင့် ရန်ကုန် အပြည်ပြည်ဆိုင်ရာ လေဆိပ်သို့ ရောက်ရှိလာစဉ် ဖမ်းဆီးရမိခဲ့ကြောင်း မြန်မာ့အလင်းသတင်းစာ ရေးသားခဲ့သည်။

ယခုလ ၂၄ နေ့ထုတ် မြန်မာ့အလင်းတွင် သူသည် ထိုင်းအခြေစိုက် မြန်မာနိုင်ငံ ဒီမိုကရက်တစ် အင်အားစု FDB အစီအစဉ်ဖြင့် တာဝန်ခံ၍ ငွေပေးပို့ခဲ့ကြောင်းနှင့် ပြည်သူများကို ငွေကြေးထောက်ပံ့ကာ ဆူပူမှု ဖြစ်ပွားရန်နှင့် ယခုလည်း အကြမ်းဖက်လုပ်ငန်းများ လုပ်ဆောင်ရန် မြန်မာနိုင်ငံသို့ ပြန်လာခြင်းဖြစ်ကြောင်း ဆိုထားသည်။

FDB အတွင်းရေးမှူး ကိုငွေလင်းက “ကိုညီညီအောင်နဲ့ နိုင်ငံရေးအရ ပူးပေါင်းဆောင်ရွက်မှု မရှိဘူး။ မြန်မာ့အလင်းမှာပါတဲ့ ဘယ်သူနဲ့ ပါးလိုက်တယ်ဆိုတာတွေက FDB နဲ့ မဆိုင်ဘူး။ တခုက ဖောက်ခွဲရေး ကိစ္စတွေက ကျနော်တို့ FDB နဲ့ လုံးဝ မပတ်သက်ဘူး” ဟု ငြင်းဆိုသည်။

ထို့အပြင် လွန်ခဲ့သည့် တလအတွင်း ရန်ကုန်နှင့် ရခိုင်ပြည်နယ်မှ ရခိုင်ကျောင်းသားလူငယ် အနည်းဆုံး ၁ဝ ဦးထက်မနည်း ဖမ်းဆီးခဲ့ခြင်းနှင့်ပတ်သက်ပြီး လူငယ်များမှာ ရခိုင်ပြည်နယ်လုံးဆိုင်ရာ ကျောင်းသားလူငယ်များ AASYC အဖွဲ့ဝင်များဖြစ်ပြီး၊ ABSDF သောင်းကျန်းသူအဖွဲ့နှင့် ချိန်ဆက်ပြီး အဖျက်စွမ်းအား ကြီးမားလှသည့် ဖောက်ခွဲရေးလုပ်ငန်းများ အကြိမ်ကြိမ်ဆောင်ရွက်ရန် စီမံထားရှိကြောင်း စစ်အစိုးရအာဘော်သတင်းစာက ရေးထားသေးသည်။

ABSDF ခေါ် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး၏ ဥက္ကဋ္ဌ ကိုသံခဲက “သူတို့ရေးသားထားတဲ့ ကျနော်တို့ အဖွဲ့အစည်းနှစ်ခုက မြန်မာနိုင်ငံ ဒီမိုကရေစီ ရရှိဖို့အတွက် ကြိုးပမ်းဆောင်ရွက်တဲ့ အဖွဲ့ဖြစ်ပါတယ်။ သူတို့စွပ်စွဲထားသလို တိုင်းပြည်ထဲမှာ မတည်မငြိမ်ဖြစ်အောင် ကျနော်တို့ဘက်က ဖောက်ခွဲမှု လုပ်နေတယ်ဆိုတာ လုံးဝ မရှိပါဘူး။ အခုလည်း မလုပ်သလို နောင်လည်း လုပ်မှာ မဟုတ်ပါဘူး” ဟု ပြောဆိုသည်။

ကိုညီညီအောင်သည် ယခင်က ABSDF တပ်ဖွဲ့တွင် တာဝန်ထမ်းဆောင်ခဲ့သော်လည်း ယခုအခါ တပ်ဖွဲ့ဝင် မဟုတ်သလို၊ တာဝန်မထမ်းဆောင်တော့သည့် နောက်ပိုင်းတွင် ဆက်နွယ်ပတ်သက်မှု မရှိတော့ကြောင်းနှင့် ယခု အဖမ်းခံရမှသာ ကြားသိရပြီး ABSDF မှ တိုင်းပြည်တွင် ဖောက်ခွဲမှုပြုလုပ်ရန် စေလွှတ်ခဲ့ခြင်း မရှိကြောင်း ကိုသံခဲက ဆက်လက်ရှင်းပြသည်။

စစ်အစိုးရ၏ ရေးသားချက်များသည် အတိုက်အခံအဖွဲ့များကို တဖက်သတ် ရှုတ်ချမှုအဖြစ် သိသာပေါ်လွင်နေပြီး၊ ၂၀၁၀ မတိုင်ခင် ဒီမိုကရေစီအရေးအတွက် ကြိုးပမ်းနေသူများအပေါ် အကြမ်းဖက်သမား စွပ်စွဲခြင်း၊ ပုဒ်မ အမျိုးမျိုးဖြင့် ဖိနှိပ်ထောင်ချရန် ရည်ရွယ်ခြင်းဖြစ်ကြောင်း စွပ်စွဲခံရသည့် ဤအဖွဲ့အစည်း ခေါင်းဆောင်များက ပြောဆိုကြသည်။