သတင်း သဲသဲ မဇ္ဈိမ | နယူးဒေလီ (မဇ္ဈိမ)။ ။ အဓမ္မ လုပ်အားပေးခိုင်းစေခဲ့သော ဒေသခံအာဏာပိုင်များကို အထူးစုံစမ်းရေးက စစ်ဆေးလျှက်ရှိသည်ဟု မြို့နယ်အဆင့် အာဏာပိုင်များက ပြောသည်။
ပဲခူးတိုင်း သနပ္ပင်မြို့နယ် သနတ်တန်းကျေးရွာမှ ကျေးရွာအေးချမ်းသာယာရေးနှင့် ဖွံ့ဖြိုးရေးကောင်စီ အဖွဲ့ဝင် များသည် သောက်ရေကန်များ မြေဖို့ရန် ရွာသားများအား ဆင့်ခေါ်ကာ လုပ်အားပေး ခိုင်းစေခဲ့မှုအတွက် ကျေးရွာသား ၁၀၀ ကျော်က ခရိုင်အေးချမ်းသာယာရေးနှင့် ဖွံ့ဖြိုးရေးကောင်စီနှင့် အထူးစုံစမ်းစစ်ဆေးရေးအဖွဲ့ (စသုံးလုံး) သို့ တိုင်တန်းရာမှာ စစ်ဆေးခံနေရခြင်း ဖြစ်သည်။
"ခရိုင်ရုံးအထိ ရွာသားတွေက တိုင်လို့ အဲဒီ ရယက အဖွဲ့ဝင်တွေကို အကုန်ခေါ်စစ်တာ။ စစ်လို့ မပြီးသေးဘူး" ဟု မယက ရုံးဝန်ထမ်းတဦးက မဇ္ဈိမကို ပြောသည်။
ပြီးခဲ့သည့်နှစ် ဒီဇင်ဘာလအတွင်း သောက်ရေကန် မြေဖို့ရန်အတွက် လယ်ပိုင်ရှိသူများက တအိမ်ထောင်လျှင် ပေ ၂၀ ပတ်လည်ရှိ မြေကျင်းတကျင်းစီ တူးရပြီး၊ လယ်မရှိသူများက နှစ်ကျင်းစီ တူးခဲ့ရသည်။ ထို့အပြင် ရယက အဖွဲ့ဝင်များနှင့် ဆွေမျိုးသားချင်းများ၏ လယ်ကွက်များကိုပါ ရေငန် မ၀င်ရောက်စေရန် မြေကျင်းများ တူးပြီး တာဖို့ ခိုင်းခဲ့သေးသည်။ လုပ်အားပေး မလိုက်သူကို ၁၅၀၀ ကျပ် ပေးဆောင်ရမည်ဟု ရယက က ညွှန်ကြား ခဲ့သည်။
"သောက်ရေကန် မြေဖို့ဖို့တင် မကဘူး။ အခုဟာက သူတို့အမျိုးတွေနဲ့ ရွာထဲက သူတို့နဲ့ ငွေကြေး အဆက်အဆံ လုပ်ကြတဲ့ သူတွေရဲ့ လယ်တွေထဲကို ရေငန်မ၀င်အောင် တာဖို့ပေးရတော့ ရွာကလူတွေ မကျေနပ်လို့ တိုင်ကြတာ" ဟု အဓမ္မ လုပ်အားပေးခိုင်းစေခံရသည့် ရွာသားတဦးက ပြောသည်။
ယခုလို တိုင်တန်းခဲ့သဖြင့် ဒေသတွင်း၌ ဖြစ်ပွားနေသော လုပ်အားပေး ခိုင်းစေမှုများကို ယခုလ ၄ ရက်နေ့က ရပ်ဆိုင်းလိုက်ကာ ဒဏ်ငွေ ကောက်ခံခဲ့သည့် ငွေကြေးကို ပြန်ပေးသော်လည်း ရွာသားများက လက်မခံဘဲ တိုင်တန်းခဲ့ခြင်း ဖြစ်သည်။
အဓမ္မလုပ်အားပေး ခိုင်းစေခံရမှုများကို သက်ဆိုင်ရာ အာဏာပိုင်များနှင့် နိုင်ငံတကာ အလုပ်သမားအဖွဲ့ချုပ် (အိုင်အယ်အို) ရုံးသို့ တိုင်ကြားနိုင်ကြောင်း ကျေးရွာလူတန်းစားများမှ သိရှိမှု နည်းပါးသည်ဟု အဆိုပါ အမှုကို ဦးဆောင်တိုင်ကြားပေးခဲ့သူ ပဲခူးမြို့ လမ်းပြကြယ်အဖွဲ့မှ ရှေ့နေ ဦးအေးမြင့်က မဇ္ဈိမကို ပြောသည်။
ယခုလို သိရှိမှု နည်းပါးရသည့်အပေါ် အခွင့်ကောင်းယူကာ ကျေးရွာအုပ်ချုပ်သူများက အာဏာကို အလွဲသုံးစား ပြုခြင်းဖြစ်သည်ဟု သူက ဆက်ပြောသည်။
စစ်အစိုးရအုပ်ချုပ်သော နိုင်ငံတွင် အဓမ္မလုပ်အားပေးခိုင်းစေခြင်းများ ပေါပေါများများ ဖြစ်ထွန်းခဲ့ပြီး တိုင်တန်း သူများကိုလည်း အာဏာပိုင်များက တန်ပြန်အရေးယူမှုများ ပြုလုပ်ခဲ့ဖူးသည်။
ကမ္ဘာ့အလုပ်သမား အဖွဲ့ချုပ်ထံ တိုင်ကြားခဲ့ဖူးသူ နတ်မောက်မြို့နယ်မှ တောင်သူ ၄ ဦးမှာ အဖမ်းခံရပြီး အင်တာနက်မှ တဆင့် အစိုးရဆန့်ကျင်ရေး သတင်းအချက်အလက်များ ဖြန့်ဝေမှု အစိုးရက စွဲချက်တင်ခံခဲ့ရသည်။
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။