သတင်း NEJ ခေတ်ပြိုင် | သက်ဆိုင်ရာ အာဏာပိုင်များက ယာယီဈေး နေရာချထားပေးမှု မရှိသေးသဖြင့် မီးလောင်ဒဏ်ခံလိုက်ရသည့် မော်လမြိုင် အမှတ် (၁) ဈေးသူဈေးသား (၁,ဝဝဝ) ကျော် ဒုက္ခရောက် နေဆဲ ဖြစ်ကြောင်း စုံစမ်းသိရှိရသည်။
ဆိုင်ခန်းမီးလောင်သွားသည့် ဈေးသည်တဦးက “ခုဆို ဈေးမီးလောင်တာ တလပြည့်ပြီ။ ယာယီဈေးနေရာ သတ်မှတ်ပေးတာမျိုး မရှိသေးဘူး။ ဒါကြောင့် ကမ်းနားလမ်း လမ်းဘေးမှာပဲ ခုံလေးတလုံးချပြီး ပျံကျဈေးသည်လို ရောင်းနေရတယ်။ ပစ္စည်းလည်း များများ တင်ထားလို့ မရဘူး။ ဆိုင်းဘုတ်လေး ထောင်ထားပြီး ကိုယ့် ဖောက်သည် လာရင် လိုတဲ့ပစ္စည်းတွေကို ဆိုင်ကယ်နဲ့ အိမ်ကိုပြေးပြီး သွားယူရောင်း လုပ်နေရတယ်။ ဆိုင်မထွက်ပြန်ရင်လည်း ပေးထားတဲ့အကြွေးတွေက ရှုံးကုန်လိမ့်မယ်။ ဒါကြောင့် လမ်းဘေးမှာပဲ ဖြစ်သလို ရောင်းနေရတာ” ဟု ပြောပြသည်။
အဆိုပါ ဈေးသည်နည်းတူ အခြားရာနှင့်ချီသည့် ဈေးသည်များမှာ မော်လမြိုင်မြို့ ဖက်တန်းရပ် ကမ်းနားလမ်း မြိတ်တံတားမှသည် သံလွင်တံတားအောက်ခြေ တိုင်အောင် ခုံများခင်းကာ ပျံကျဈေးသည်များအဖြစ် ဈေးရောင်း နေကြရကြောင်း၊ ဈေးသည်အများစုသည် မြိုင်ရတနာ (၂) ထပ်ဈေးနှင့် (၄) ထပ်ဈေးတို့တွင် ဆိုင်ခန်း ငှားရမ်းပြီး ဈေးရောင်းလိုကြသော်လည်း ဆိုင်ခန်းငှားရမ်းခများမှာ တလ ကျပ် (၂) သိန်းမှ (၃) သိန်း (၁) နှစ်စာ စာချုပ်ချုပ်ပြီး ပေးရသည့်အတွက် ငှားရမ်းနိုင်ခြင်း မရှိပဲ ယခုကဲ့သို့ လမ်းဘေးတွင် ဈေးရောင်း ကြရခြင်း ဖြစ်ကြောင်း အဆိုပါဈေးသည်က ပြောသည်။
အလားတူ ကမ်းနားလမ်းမှ တိုက်ခန်းများ ငှားရမ်းလိုပါကလည်း သိန်းနှင့်ချီသည့် လခ၊ တနှစ်စာ စာချုပ်ချုပ်ပြီး ပေးရမည့် အခြေအနေများကြောင့် အဆိုပါနေရာများ၌လည်း ငှားရမ်း လုပ်ကိုင်နိုင်ခြင်း မရှိကြောင်း သိရသည်။
ပြီးခဲ့သည့် ဒီဇင်ဘာ (၂၉) ရက်နေ့က ခရိုင်အဆင့် အာဏာပိုင်များနှင့် တွေ့ဆုံခဲ့သည့် ဈေးမိဈေးဖ ဈေးကော်မတီဝင် တဦးက ၎င်းတို့အနေဖြင့် ယာယီဈေးအဖြစ် မိုင်ဒါကွင်းရှိ နှစ်ပေါင်းများစွာ အသုံးမပြုဘဲ ပစ်ထားသည့် ဘောလုံးကွင်း (သို့မဟုတ်) ဈေးမီးလောင်ပြင် တစိတ်တပိုင်းကို နေရာချထားပေးပါရန် တင်ပြထားရာ၌ ဘောလုံးကွင်းနေရာကို အားကစားဝန်ကြီးဌာနက ခွင့်မပြု၍ မဖြစ်နိုင်ဆိုပြီး အကြောင်း ပြန်ခဲ့ကြောင်း၊ ခရိုင်အာဏာပိုင်များ အဆိုပြုသည့် မြို့လယ်နှင့် အလှမ်းဝေးသည့် သံလွင်ဥယျာဉ်၊ သံလွင်ဈေး နေရာများသည်လည်း ဈေးသည်များအတွက် အဆင်မပြေသည့်အတွက် လက်မခံခဲ့ကြောင်း၊ မီးလောင်ပြင်မှာ ယာယီဈေး ဆောက်ခွင့် ပေးမပေးမှာမူ မသိနိုင်သေးကြောင်း ပြောသည်။
ယခုကဲ့သို့ သက်ဆိုင်ရာ အာဏာပိုင်များက ဈေးသူဈေးသားများ အဆင်ပြေအောင် စီစဉ်မပေးသည့်အတွက် ထောင်နှင့်ချီရှိသည့် ဈေးဆိုင်ခန်းပိုင်ရှင်များ အလွန်အခက်အခဲ တွေ့နေကြရကြောင်း သိရပါသည်။
မော်လမြိုင်မြို့တွင် သက်တမ်းအရှည်ကြာဆုံးနှင့် အစည်ကားဆုံး၊ လက်ကားဈေးတခုဖြစ်သည့် အမှတ်(၁) အောက်ဈေးကြီးသည် ပြီးခဲ့သည့် ဒီဇင်ဘာ (၁) ရက်နေ့ ညနေ (၅) နာရီခွဲက မီးလောင်ကျွမ်းခဲ့သည်။
ကားဖြင့် (၅) မိနစ်ခရီးသာသာ မိုင်ဒါကွင်းမှာ မီးသတ်ဌာနတည်ရှိသော်လည်း တာဝန်ရှိသူများ၏ အစီအစဉ် ညံ့ဖျင်းခြင်းကြောင့် ဆိုင်ခန်း (၁,၁၂၄) ခန်းစလုံး မီးလောင်ပြာကျပြီး ကျပ်ငွေ ဘီလီယံပေါင်းများစွာ ဆုံးရှုံးခဲ့ရသည်။
ယခုကဲ့သို့ မြန်မာနိုင်ငံအတွင်း စီးပွားရေး ကျဆင်းပြီး ပြည်သူများ အခက်အခဲ ဖြစ်နေသည့်အချိန်၌ မီးလောင် ဆုံးရှုံးသွားသည့် ဆိုင်ခန်းပိုင်ရှင်များကို သင့်တော်သည့် ယာယီဆိုင်ခန်းနေရာ သတ်မှတ်မပေးသေးခြင်းကြောင့် ဈေးဆိုင်ပိုင်ရှင်များ အခက်တွေ့ နေရကြောင်း စုံစမ်းသိရှိရသည်။
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။