သတင်း ကိုဝိုင်း ခေတ်ပြိုင် | နအဖ အထက်အာဏာပိုင်များက ဘိုကလေးမြို့နယ်အတွင်းရှိ ကျေးရွာအုပ်စုများမှ ရွာများကို ပေါင်းစည်း၍ ရွာကြီးများအဖြစ် ပြန်တည်ဆောက်မည့် အစီအစဉ်ကြောင့် ဒေသခံများ စိုးရိမ် စိတ်ညစ်နေကြပြီး အကူအညီပေးရေးလုပ်ငန်း အချို့လည်း နှောင့် နှေးနေရကြောင်း ပြောင်းရွှေ့စာရင်းပါ ဒေသခံများနှင့် အကူအညီပေးနေသူများထံမှ သိရသည်။
ပြောင်းရွှေ့စုစည်းရမည့် လျာထားစာရင်း၌ ကျေးရွာအုပ်စု (၅) စုပါဝင်ပြီး ကြိမ်ချောင်းကြီး၊ ကျွန်းသာယာ၊ စက်ဆန်း၊ မဂူ၊ ဒေါင့်ကြီးတို့ဖြစ်သည်။
အဆိုပါ စုစည်းစီမံကိန်းကြောင့် ကျေးရွာအုပ်စု (၅) ခုပေါင်းတွင် မူလက ကျေးရွာခွဲပေါင်း (၁၅၅) ရွာရှိရာမှ (၆၃) ရွာသာ ရှိ တော့မည်ဖြစ်သည်။ စုစည်းမှုအကျိုးဆက်ကို အိမ်ခြေစုစုပေါင်း (၁၇,၀၀၀) ကျော်ခံရမည်ဖြစ်ကြောင်း၊ ယခုနှစ် အောက်တို ဘာလအတွင်း နအဖ အာဏာပိုင်များက ‘ကန့်သတ်’ ထုတ်ခဲ့သော ဖျာပုံခရိုင် ဘိုကလေး မြို့နယ် “ကျေးရွာအုပ်စုများစုစည်းရန် လျာထားစာရင်း” အရ သိရသည်။
ကျေးရွာစုစည်းမည့်အစီအစဉ် လျာထားစာရင်းကို ယခုနှစ် အောက်တိုဘာအတွင်းက ထုတ်ထားခဲ့ခြင်း ဖြစ်သော်လည်း ထိုစဉ်က အိမ်ဆောက်လုပ်ပေးမည့် အလှူရှင်များ မရှိသေးသောကြောင့် အစီအစဉ် ရပ်ဆိုင်း နေခဲ့ခြင်းဖြစ်ရာမှ ယခုအခါ အိမ်ဆောက်မည့် ထူးကုမ္ပဏီနှင့် ဒိုင်းမွန်းမီလီယံ အဖွဲ့များ ရောက်လာသဖြင့် ပြောင်းရွှေ့မှုများ ဖြစ်လာမည်ကို ရွာသားများ စိုးရိမ်နေကြကြောင်း ဒေသတွင်း အကူအညီပေးနေသူတဦးက ပြောသည်။
ထို့အပြင် ရွာများ မပေါင်းလိုကြသည့် ရွာသားများ၊ ရပ်ရွာအေးချမ်းရေးအဖွဲ့များက တဘက်၊ ပေါင်းလိုကြသည့် မယကနှင့် ၀န်ကြီး အဆင့် အထက်ပိုင်းက တဘက် နှစ်ဘက် သဘောထားကွဲနေကြောင်းလည်း သိရသည်။
ဒေသအတွင်း အကူအညီပေးနေသူက “မယက အဖွဲ့အစည်းနဲ့ ၀န်ကြီးပိုင်းပေါ့နော် အထက်ပိုင်းတွေကတော့ ပေါင်းမယ်။ ရွာ တရွာကို အနည်းဆုံး အိမ်ခြေ (၂၀၀) ထားမယ်ပြောတယ်။ ရွာသားတွေကျတော့လည်း သူတို့က သူတို့ရွာလေးတွေမှာပဲ နေချင် တယ်။ ရွာသားတွေနဲ့ (ရယက) ရပ်ရွာအေးချမ်းက တဘက်။ နောက်ဆုံး ဘယ်လိုပဲ ရင်ဆိုင်ရ ရင်ဆိုင်ရပေါ့ သူတို့က အဲဒီလို မျိုးပဲရှိတယ်” ဟုပြောသည်။
ထို့အပြင် ကျွန်းသာယာအုပ်စုအတွင်းမှ ခါချဉ်ကျွန်းတွင် JEN ဟုခေါ်သော ဂျပန်အဖွဲ့တဖွဲ့က ၀ါးအိမ်ကလေးများ ဆောက် လုပ်ပေးနေသည်ကို တွေ့နေရသောကြောင့် ၎င်းတို့ကိုယ်တိုင် ရရာသစ်များဖြင့် ဆောက်လုပ် နေထိုင်လျက် ရှိသော လက်ရှိ အိမ်ထက် ခိုင်ခန့်မှုမရှိမည်ကို အဆိုပါ ရွာသားများက စိုးရိမ်နေကြပြီး မိမိတို့မြေကိုပစ်၍ အခြားသူများ၏ မြေ၌ သွားရောက်ကပ် နေလိုစိတ်မရှိခြင်းတို့ကြောင့်လည်း စိတ်ညစ် နေကြရကြောင်း သိရသည်။
လျာထားစာရင်းပေါက်ဒေသအတွင်း၌ ရေတွင်းတူးခြင်း၊ အိမ်ဆောက်ခြင်း စသည့် လုပ်ငန်းများ လုပ်ဆောင် နေသော အကူအညီ ပေးရေးအဖွဲ့များကိုလည်း ကျေးရွာရွှေ့ပြောင်းမည့်အစီအစဉ်များရှိနေသောကြောင့် လုပ်ငန်းများ လုပ်ဆောင်နေခြင်းကို စဉ်းစားရန် အာဏာပိုင်များက သတိပေးပြောဆိုသဖြင့် အပြောင်း အရွှေ့ ဖြစ်မဖြစ် စောင့်ကြည့်နေရသောကြောင့် မည်သို့ဆက်လုပ်ရမည် မသိပဲ လုပ်ငန်းများ နှောင့်နှေးနေရကြောင်း သိရသည်။
လတ်တလော၌ အဆိုပါ ကျေးရွာစုစည်းရေးအစီအစဉ်ကြောင့် ဒေသအတွင်း၌ ပြဿနာတစုံတရာ အကြီးအကျယ် မတက်သေး သော်လည်း သဘောထားကွဲနေသည့် ဘက်နှစ်ဘက်အကြား အပြန်အလှန် အရိပ်အခြေ ကြည့်နေကြကြောင်း၊ အကူအညီပေး သူများကလည်း မည်သို့ဖြစ်လာမည်နှင့် မည်သို့ကူညီရမည်ကို စောင့်ကြည့် နေကြရကြောင်း သိရသည်။
;)
အကြီးကြည့်ရန် နှိပ်ပါ။
0 comments:
Post a Comment
သင်ကြိုက်တာရေးပါ။